Қоғаммен байланыс қолдау тапты

Мәселен, жуырда Сыбайлас жемқор­лыққа қарсы іс-қимыл агенттігі Серік­тестік департаменті директорының орынбасары Перизат Сәдуақас өткен жылы сәуірде іске қосылған эксклюзивті контенті бар AntikorNews атты ерекше медиа жобасына тоқталды. Осы уақыт аралығында бұл жоба атал­­ған агенттіктің БАҚ-пен және жұрт­шы­лықпен өзара іс-қимылының маңыз­ды құралына айналған.  Сыбайлас жем­қорлыққа қарсы контенттің үздіксіз он­лайн көрсетілімін қамтамасыз ету ар­қылы Антикор қызметінің нәтижелері мен басымдықтары туралы жедел хабарлар таратылып отырған.

Перизат Сәдуақастың айтуынша, қазақ және орыс тілдерінде ақпарат тарататын AntikorNews жаңалықтары алдын алу шараларына, сыбайлас жем­қорлыққа қарсы заңнамаға, агенттіктің қоғамдық алаңдағы жұмысына қатысты мәселелердің кең ауқымын қамтып ке­леді екен. Мәселен, «Адалдық алаңы», арнайы мониторинг тобы, респуб­ли­калық ақпараттық-ағарту штабы, «Сапалы жол», «Ашық бюджеттердің интерактивті картасы», «Адал көмек», «Саналы ұрпақ» және басқасы бар.

Жаңалықтар апта сайын агенттіктің ресми сайтында және әлеуметтік же­лілердегі аккаунттарында жарияланып, барлық өңірлік телеарналардан көрсетіледі. Осылайша, өткен жы­лы орталық аппарат агенттіктің қыз­метіне қатысты AntikorNews-тің 40 шығарылымын, аумақтық департаменттер 650 шығарылымын әзірлеген. Перизат Сәдуақас бұл жобаның аз­ ға­на уақыт аралығында нәтиже беріп, сұранысқа ие болғанын, оның тұжы­рымдамасына тіпті Иордания Король­дігі Сыбайлас жемқорлыққа қарсы комиссиясының қызығушылық танытып, өз ведомстволарында осындай жобаны енгізуді жоспарлап жатқандығын атап өтті.

– AntikorNews жобасының аясында 60-қа жуық баспасөз мәслихаты өткізіліп, 130-ға жуық жедел түсірілім және БАҚ-та 6,2 мыңнан астам материал­ жарияланды. Сыбайлас жемқорлыққа қарсы өзекті тақырыптар бойынша аумақ­­тық департаменттер де апта са­йын­ өздерінің баспасөз брифингтерін ұйымдастырды. Былтыр 800-ден аса спикердің, сондай-ақ облыс әкімдерінің қатысуымен 587 баспасөз мәслихаты өткізілді, – деді ол.

Бұл ретте, департамент директоры­ның орынбасары парасаттылық идеологиясын түсіндіруге және қоғамда сыбайлас жемқорлыққа қарсы мәдениетті қалыптастыруға арналған онлайн-алаң саналатын АntikorLive медиа-жобасына да тоқталды.

– Агенттіктің АntikorLive медиа-жобасы парасаттылық идеологиясын түсіндіруге және қоғамда сыбайлас жемқорлыққа қарсы мәдениетті қа­лып­­тастыруға бағытталған. Бұдан бө­лек, жоба аясында мемлекетіміздің сыбайлас жемқорлыққа қарсы іс-қи­мыл саласындағы саясатының түрлі ас­­пектілері қамтылып отырады, – деді Перизат Сәдуақас.

Айта кетейік, AntikorLive жобасы­ның аудиториясын танымал әлеуметтік желілер мен бейнехостингтердің оқыр­мандары құрайды. «Тікелей эфирлер» белгіленген уақытта орталық және жергілікті атқарушы органдар қызметкерлерінің, квазимемлекеттік сектор өкілдерінің, сондай-ақ қоғамдық пікір көшбасшыларының қатысуымен сұхбат, блиц, дәріс форматында өтеді. Эфир БАҚ-та жарияланып, соның барысында спикерлер азаматтардың сұ­рақтарына жауап береді. Тіпті кейбір тақырыптар қоғамдық резонансқа ие болып, мемлекеттік органдардың назарын проблемалық мәселелерге аударады.

– Өткен жылы AntikorLive жо­басының аясында 150 спикердің қа­тысуымен 139 тікелей эфир өтті. Өңір­­­­лерде 4 500-ден астам спикердің қатысуымен 5,5 мың тікелей эфир ұйым­дастырылды. Жалпы, қаралым саны шамамен 4 миллионды құрады. Былтыр агенттік алаңындағы AntikorLive жобасына бірқатар шенеуніктер мен айтулы азаматтар, орталық мемлекеттік және жергілікті атқарушы органдардың басшылары, сондай-ақ қоғам өкілдері қатысты, – деді Перизат Сәдуақас.

Есепті кезеңде агенттік жергілікті ат­қарушы органдармен және қоғам­дық ұйымдармен бірлесіп, сыбайлас жемқорлыққа қарсы тақырыпқа ар­налған 3,5 мыңнан астам билбордтар мен баннерлер, 1 100-ден астам бей­­неролик, 400-ге жуық аудиоролик дайындаған. Сондай-ақ өткен жы­лы Сыбайлас жемқорлыққа қарсы қыз­мет әлеуметтік желілерде бірқатар бо­лашағы бар жобаларды іске қосты.

Мәселен, былтыр агенттік әлеу­мет­тік желілерде AntikorNews, АntikorLive сынды бастамаларымен қатар, «Агенттік қызметкерінің бір күні» және AntikorCase сияқты әлеу­меттік желі қолданушылары арасында оң пікірге ие болған, ертеңінен үміт күттірерлік жобаларды іске қосты. Белсенділікті арттыру үшін Instagram парақшасында жаңа айдарлар ашылған. Аудиторияны тарту мақсатында «Сіз білесіз бе?», «АнтикорТаланттары», «Ұлы­лардың қанатты сөздері», «Күн саны», «Миф және шындық» айдар­ларымен қатар, танымдық және ани­мациялық постар, бейнероликтер жа­рияланған.

Сондай-ақ агенттік қызметінің ашық­­­­тығы мен айқындығының көрсет­кі­ші саналатын Antikor ortalyǵy сер­вистік орталығы да, кері байланыс­тың пәрменді тетігі ретінде танылған «Ашық диалог» электрондық үкімет порталы да маңызды бастамалар саналады.

Агенттік бүгінде сыбайлас жем­қор­лыққа қарсы іс-қимыл саласындағы аза­маттық бастамаларды талқылауға және іске асыруға әрқашан дайын.