Осы жылдары облыс, аудан тіпті қажет болған жағдайда шағын қала типтес кенттердің өзінде газеттің «Жергілікті тілшісі» дейтін атпен қаламы жүйрік, жазу-сызуға бейім коммунист немесе комсомол мүшелері қызмет атқарған. Соның бірі – бүгінгі таңда сексеннің сеңгіріне шығып отырған қарт қаламгер – Амантай Кәкен. Бұл кісі Ұлттық қауіпсіздік саласының ардегері бола тұра, халқымыздың бастан кешкен налалы күндер мен зұлматты жылдардың жан ауыртар жаңғырығын архивтік құжаттар негізінде жасқанбай жазып жүрген жақсы ағамыз.
Жоғарыда айтқанымыздай Амантай Ғазезұлына 1966 жылы 31 желтоқсан күні «Социалистік Қазақстан» газетінің «Целиноград облысы бойынша жергілікті тілшісі» дейтін куәлік беріліпті. Өзінің айтуы бойынша, бұл мәртебе екінің біріне бұйыра бермейді. Бұндай куәлікті алу үшін әуелі жергілікті обком мен атқару комитеті кепілдік береді екен.
Ағамыздың бұл куәлікке қол жеткізуіне сол тұста газеттің Тың өлкесіндегі меншікті тілшісі Орақбай Смағұловтың да әсері бары анық. Өйткені Ақсу кенішінде электрик болып жүрген қоғам белсендісі Амантай Кәкенов бірде өндірісте техника қауіпсіздігі ережелерінің қатаң сақталмағандығынан және басшы инженер-техник қызметкерлерінің оралымсыздығынан карьерде техногендік апатқа жол беріліп, техникалық құрал-жабдықтар кен орнындағы забойда су астында қалып қойғаны туралы Орақ ағасына телефон арқылы хабарлап, осы мәселе жайлы орталық газетке мақала жазғысы келетінін айтады.
Арада бір күн өткенде Орекең өзі келіп, жағдайды көзімен көрген соң інісіне «жаз» деп лепес тастайды. Сөйтіп, «Социалистік Қазақстанның» 1963 жылғы 31 тамыз күнгі санына «Жауапкершілік қайда?» деген атпен сын мақала жарық көреді. Ол тұста газеттің беделі бес батпан. Өнеркәсіп-өндірістік партия комитетінің секретары С.Красностанов: «А.Кәкенов жазған сын мақаланы арнайы талқыладық, автор кен карьерінің жұмысында елеулі кемшіліктер орын алып отырғандығын дұрыс көрсеткен. Тексеруде газетте көрсетілген фактілер анықталды. Орын алған кемшіліктерді алдағы уақытта болдырмау үшін нақты шаралар белгіленді» деп шырылдап жауап жазыпты («Социалистік Қазақстан», 28.11.1963).
Сөйтіп, қаламын қандап, мақала жазу ісіне құлағымен ін қазған қарсақтай дәніккен жергілікті тілші кешікпей Целиноград облысы Ерейментау ауданы «Өлеңті» совхозының атақты жылқышысы Қаппас Жаниев жайлы очерк жазады. Бұл да жарық көреді. Онсыз да еңбегі өрге жүзіп тұрған жылқышы 1966 жылы 20 наурызда Социалистік Еңбек Ері атанады.
Кезінде «Тың өлкесі» газетін басқарған, кейін «Социалистік Қазақстан» басылымында редактордың орынбасары болған Сапаржан Хайдаров 1976 жылы жарық көрген «Жүрек сызы» атты очерктер мен публицистикалық мақалалар жинағының 9-бетінде: «Целиноград облысы «Өлеңті» совхозы әйгілі шаруашылықтың бірі. Совхоздың табысына Қ.Жаниев бастаған жылқышылар қомақты үлес қосып келеді. Соған орай 1966 жылы жылқышылардың ерен еңбегі жоғары бағаланды. Сол қуаныш тұсындағы сәттер жергілікті журналист Амантай Кәкенов дәптеріне түсті. Біз ол жазбаны түгел қабылдадық» деп таңбалап жазыпты. Қызық болғанда Орақбай Смағұлов өзінің орны меншікті тілшілікке Амантай ағамызды дайындап, енді міне-міне деп тұрғанда Әбекеңді Мемлекеттік қауіпсіздік саласы «жұлып» әкеткен.
