Жастарды отаншылдық сезімге баулу, патриоттық рухта тәрбиелеу мақсатында мемлекеттік «Ежелгі Тараз ескерткіштері» тарихи-мәдени қорық-музейі «Ұлыстың мақтанышы – ұлы Жамбыл» атты іс-шара ұйымдастырды. Аталған шара «Шерхан Мұртаза атындағы руханият және тарихтану» орталығында өтті.
Әуелі келушілер Жамбыл Жабаевтың өмірі мен өнер жолынан сыр шертетін көрмені аралап көрді. Аталған қорық-музейдің тарихшысы Мәдина Ибаділдаева қонақтарды жырау өмірінің түрлі кезеңін қамтитын материалдармен таныстырды. Жиында «Ежелгі Тараз ескерткіштері» тарихи-мәдени қорық-музейінің директоры Нұрлан Бықыбаев сөз алып, Жамбыл шығармашылығы төңірегінде өз ойымен бөлісті. Ал жазушы-драматург Елен Әлімжан жыр алыбы туралы Мұхтар Әуезов, Ғабит Мүсірепов, Әбділда Тәжібаев сияқты әдебиет қайраткерлерінің естеліктерін айтып, Жамбыл шығармашылығының ерекшеліктеріне тоқталды. Сондай-ақ облыстық «Тарихи-мәдени ескерткіштерді қорғау және қалпына келтіру дирекциясы» мекемесінің директоры Қуаныш Дәурембеков Жамбыл Жабаевтың, Бейімбет Майлин, Ілияс Жансүгіров сынды сөз зергерлерімен тығыз байланыста болғанын табылған архив деректері негізінде әңгімелесе, айтыскер ақын Есет Досалы Жамбыл өңірінде жыр алыбының жолын қуған жас айтыскерлердің өсіп келе жатқанын, олардың алды еліміздегі аламан айтыстарда топ жарып жүргенін жеткізді. Сонымен қатар Асқар Тоқпанов атындағы облыстық қазақ драма театрының әртістері әйгілі Сүйінбай ақынның бала Жамбылға бата беру сәтін сахналады. Әнапия Ахметов пен Нұрсұлтан Маханов ұстаз бен шәкірт арасындағы рухани сабақтастықты ерекше шеберлікпен жеткізе білді.
Жалпы, жиында Жамбыл Жабаевтың өмірі мен өнерін жаңаша тұрғыдан зерттеу, өңірде ақын атындағы конкурстар ұйымдастыру, тапсырыспен әдеби дүниелер жаздыру, бір сөзбен айтқанда, жырау атын ұлықтау мәселесі сөз болды. Бұл ретте Қуаныш Дәурембеков облыстық мәдениет, архивтер және құжаттама басқармасында іс-шаралар жоспары жасалғанын, алдағы уақыттарда Тараз қаласында ақын атындағы республикалық ақындар мүшәйрасымен қатар, айтыс ұйымдастырылатынын да жеткізді. Жырау есімін ұлықтау мақсатындағы шаралар тек ақынның туған күні ақпан айында ғана емес, жыл бойы жалғасатын болады.
Жамбыл облысы
