Мәліметтерге сәйкес қонақүй шатқалдан 4 шақырым жерде бой көтереді. Қазір мұнда инженерлік-геологиялық іздеу жұмыстары жүріп жатқан сыңайлы. Өңір әкімдігі бұл ақпаратты растады, ал инвесторлар құрылыс техникасы ерекше қорғалатын аумаққа мүлде жақындамайды деп сендіріп отыр.
Еске сала кетейік, Экология министрі туризмді дамыту мен Бозжыра сияқты уникалды табиғи нысанның экожүйесін сақтаудың арасында тепе-теңдік болу керектігін айтқан-ды.
Оған қоса бұған дейін маңғыстаулық белсенділер табиғи қорықта қонақүйдің салынуына қарсылық білдірген еді. Осыдан кейін Мемлекет басшысы Қасым-Жомарт Тоқаев Үкіметке жобаны қайта қарауды тапсырған. Алайда көпшіліктің наразылығына қарамастан, билік қорыққа қонақүй ауадай қажет деген ұстанымнан таймай отыр.
