Суретті түсірген Валерий Бугаев
– Бұл бөлімшенің негізгі міндеті – науқастарды қабылдау, диагностика жасау және жедел көмек көрсету. Былтыр жедел медициналық көмек алу бойынша біздің ауруханаға 62 мың адам түсті. Науқастардың 16,5 мыңы ауруханада емделсе, қалған науқастар амбулаторлық ем қабылдауға жіберілді. Әрине, науқастар денсаулық жағдайларына байланысты «Қызыл», «Сары» және «Жасыл» санатқа бөлінеді. Жаңа бөлімше ғимаратының қосымша салынуы арқылы емделушілердің қай топқа қарайтыны бірнеше минуттың ішінде анықталып, тиісті бағыт бойынша емдеуге жіберіледі, – дейді №1 қалалық аурухананың бас дәрігері Нұрлан Жұмажанов.
1979 жылы салынған аурухана ғимаратында медицинаның заманауи талаптарына сай науқастарды қабылдау бөлімін қайта құру туралы шешім қабылданды. Бұл жобаның құны – 2,4 млрд теңге, оның 1,8 млрд теңгесіне медициналық құрал-жабдықтар сатып алынған. Бөлімшедегі операциялық бөлмелер эндоскопиялық және мобильді диагностикалық құралдармен жабдықталған. Онда реанимациялық зал, операциялық блок, таза бөлмелер кешені бар. Реаниматологтың жұмыс стансасы онлайн режімде бірден 16 науқастың денсаулығын көрсетіп, олардың жағдайын қадағалауға мүмкіндік береді. Қарқынды терапия бөлмесі өкпені жасанды желдету аппараттары, дефибрилляторлар, мониторлар және жылжымалы бақылау аппараттарымен жабдықталған. Тағы бір жаңа жабдық – қуаттылығы сағатына 60 тест жасай алатын иммуногематологиялық анализатор орнатылған.
– Шұғыл көмек көрсетуді қажет етпейтін «Жасыл» топтағы науқастар үшін жеке кіру есігі қарастырылған. Біздің қызметкерлер жаңа жабдықтармен жұмыс істеуге толық дайын, реанимация, кеңейтілген жүрек-өкпе реанимациясы, жарақаттану кезінде ауруханаға дейінгі медициналық көмек көрсету курстарынан өтті, – дейді бас дәрігер.
Алдағы уақытта науқастарды қабылдау және оларға көмек көрсету мерзімдері реттеледі. Қосымша бөлімшенің ашылуына қатысқан облыс әкімі Әбілқайыр Ысқақов науқастарды қабылдау және оларға көмек көрсету мерзімдерінің орындалуына үнемі мониторинг жүргізу қажеттігін тапсырды. «Сонда ғана медициналық инфрақұрылымға салынған инвестицияның нәтижесі болады. Ең бастысы, ауруханаға түскен науқас барлық қажетті медициналық көмекті алуы тиіс, – деді облыс әкімі.
Ал облыстық кардиологиялық кешен жанындағы Инсульт орталығы рентген-эндоваскулярлық хирургия зертханасын және стерильдеу бөлімшесін қайта жоспарлау нәтижесінде құрылды. Мұнда операциядан кейінгі және ауыр жағдайдағы науқастар үшін қарқынды терапия бөлімі, сондай-ақ компьютерлік томография кабинеті және рентген-операциялық бөлмелері бар. Оның барлығы да жедел және бір жерде көмек көрсетуге мүмкіндік беретін заманауи медициналық жабдықтармен қамтылған.
– Жыл сайын өңірде инсультке шалдығатын науқастардың көбеюіне байланысты осы орталыққа қажеттілік туындады. Тек өткен жылы 2,5 мыңға жуық адам инсульт алған. Енді жаңа ашылған бөлім алғашқы диагностиканы 7 минутта анықтауға мүмкіндік береді, – дейді кардиоорталық басшысы Әділжан Әлбазаров.
Алдағы жылы кардиологиялық орталықты толыққанды клиникалық-диагностикалық кешенге айналдыру жоспарлануда. Бұл операция жасауды қажет ететін қантамыр аурулары бар науқастар санын едәуір азайтуға мүмкіндік береді. Жобалар барысында бүгінде орталықта жүрекке жылына 600-ге жуық ашық операция жасалып келсе, болашақта бұл көрсеткішті дәрігерлер 1 мыңға дейін жеткізбек.
Павлодар облысы
