Бұл шаңғы спорты орталығын қостанайлықтар көптен күткен еді. Өңірде қыс ұзақ, жыл сайын қар шаңғы сырғанайтын қалыңдықта жауады. Қысқы спорт түрлеріне қызығушылар көп те, ал жасалған жағдай кемшін болатын. Елбасы Нұрсұлтан Назарбаев өзінің Қазақстан халқына Жолдауларында халықтың денсаулығына, саламатты өмір салтына аса мән беріп келеді. Соңғы жылдары Қостанайда спорт нысандары бірінен кейін бірі бой көтерді.
Бұл шаңғы спорты орталығын қостанайлықтар көптен күткен еді. Өңірде қыс ұзақ, жыл сайын қар шаңғы сырғанайтын қалыңдықта жауады. Қысқы спорт түрлеріне қызығушылар көп те, ал жасалған жағдай кемшін болатын. Елбасы Нұрсұлтан Назарбаев өзінің Қазақстан халқына Жолдауларында халықтың денсаулығына, саламатты өмір салтына аса мән беріп келеді. Соңғы жылдары Қостанайда спорт нысандары бірінен кейін бірі бой көтерді.
Енді, міне, Тобыл өзенінің жағасынан «Арлан-2050» шаңғы спорты орталығы ашылды. Оған қатысқан облыс әкімі Нұралы Сәдуақасов бұл спорт нысаны саламатты өмір салтын қалыптастыруда жаңа белес екенін айтты.
– Қазір тек Қостанай қаласының өзінде ғана 313 спорт ғимараты бар, оның қатары жыл сайын толығып келеді. Облыс орталығында спортпен және денешынықтырумен айналысатындар саны 57 мыңнан асып түседі, оның ішінде спорт секцияларына 22 мың жас барады. Спорт – адамдар денсаулығының кепілі. Еліміз спортшыларының қысқы Азия ойындарындағы табысынан кейін Сочиде өтетін XXII Қысқы олимпиададан да үмітіміз мол. Біздің әлемдік деңгейдегі спортшы жерлестеріміз де ел намысы үшін күресетін болады, – деді Нұралы Мұстафаұлы.
Жаңадан ашылған орталықта спорттың қысқы түрімен айналысамын дегенге барлық жағдай бар. Шаңғы даңғылының ұзындығы 130 метр, ені 36 метр. Мұнда келушілер биіктетілген тау шаңғысын да тебе алады. Ал екі қабаттан тұратын шаңғы орталығы ғимаратының ішінде келушілерге киім ауыстыратын орындар, ыстық шай ішетін дәмхана, қонақүй секілді барлық қолайлылық қарастырылған.
Шаңғы спортынан кезінде әлемді дүрілдеткен Иван Гаранин осында тұрады. Ардагер спортшы жаңа шаңғы жолынан бірінші болып өтті.
– Мен 1975 жылы шаңғымен 90 шақырымды 4 сағат 30 минут 34 секундта жүгіріп өткен едім. Бұл рекордты әлемде әлі ешкім жаңартқан жоқ. Біздің спортшыларға өсу керек. Ал мынандай заманауи спорт орталығы барда жас шаңғышылардың төмен көрсеткіш көрсетуге хақы жоқ, – деді Иван Гаранин.
Алдағы уақытта жаңадан ашылған шаңғы спорты орталығына жақын орналасқан шаңғы базасы да қайта жөндеуден өткізілетін болады. Әрине, бұл шаңғы спортының облыста бұқаралық сипат алуына мүмкіндік туғызады. Шаңғы орталығы орналасқан Тобылдың жағасын жаз айларында да тиімді пайдалану үшін алдағы уақытта сүйретпелі су шаңғысы жолын салу жоспарда бар.
Бұл заманауи демалыс кешеніне кәсіпкер Болат Теңізбаев өз қаражатын салды. Көптің игілігіне айналар іске ол да ұзақ ғұмыр тіледі.
Нәзира ЖӘРІМБЕТОВА,
«Егемен Қазақстан».
ҚОСТАНАЙ.
