Облыстық Полиция департаментінің мәліметінше, қазір «Police 102» мобильді қосымшасы Павлодар, Екібастұз, Ақсу қалаларында жұмыс істейді. Жыл соңына дейін барлық аудан орталықтарында іске қосылады. Цифрлы қосымшаның міндеті – полицияны халыққа етене және қолжетімді ету.
Мысалы, ұсақ құқық бұзушылықтар: көршілер шу шығарса, подъезде шылым шексе, түнгі тыныштықты бұзса, жол апаты, қарақшылық сынды басқа да қылмыстар орын алса, куәгер оқиға орнында тұрып, полицеймен байланысқа шығады. Қоңырау түскен бойда аталған орынға құқық қорғау қызметкерлері жіберіледі. Қосымшадағы «SOS» дабыл нүктесін басып, қоғамдық орындарда, жолда, көшеде тіркелген қылмыс жөнінде полицейге хабар беріп, көмек сұрауға болады. Мобильді қосымша ұялы телефондағы «AppStore», «PlayMarket» дүкендері арқылы тегін жүктеледі. Ал «Police 102» арқылы түскен өтінішті, аудио және бейне қоңырауды жедел басқару орталығының мамандары қабылдайды. Қызметкерлер оқиға орнының мекенжайын сұрап, мамандарды жібереді. Егер қылмыс фактілері тіркелсе, жедел-тергеу қызметінің мамандары барады. Тұрғындар құқық бұзушылықтың куәгері болған жағдайда ғана байланысқа шығады. Мұндағы мақсат – қоғамдық тәртіпті сақтауда тұрғындар мен құқық қорғау қызметкерлерінің ортақ мүдде орайында жұмыла әрекет етуін қамтамасыз ету.
Мәселен, «Police 102» қосылған алғашқы күні-ақ, 3 ақпанда сағат 10.45-те полицияға қосымша арқылы бейне қоңырау келіп түскен. Облыс орталығында Қ.Сәтбаев көшесіндегі сауда үйлерінің бірінің жанында көлік дұрыс тұраққа қойылмағанына шағымданған. Ұсақ құқық бұзушылықты хабарлаған адам бұл жайды операторға көрсетті. Оқиға орнына келген патрульдік полиция автокөлік иесіне қатысты ӘҚБК-нің 597-бабы бойынша әкімшілік іс қозғаған.
Сондай-ақ «Ертіс-4» ПИК төрағасы Сергей Астапущенко қаладағы көп қабатты үйлердің бірінің тұрғыны кіреберістің жанында қоқыс пен картон қораптарды жинап жатқанын хабарлаған. Телефон арқылы көрсетілген мекенжайға учаскелік полиция инспекторы жіберіліп, ӘҚБК 505-бабының 1-бөлігі бойынша қоғамдық тәртіпті бұзушыға қатысты әкімшілік хаттама толтырады. Тағы бір бейне қоңырау Ә.Бектұров көшесінде орналасқан №111 үйдің тұрғыны жалға берілетін көрші пәтерде түнгі уақытта шу шығатынына шағымданған. Тыныштықты бұзғаны үшін жалға алушы әкімшілік жауапкершілікке тартылды.
Еліміздегі полиция саласын цифрландыру – құқықтық тәртіпті қорғау және азаматтардың қауіпсіздігі мен тыныштығын қамтамасыз етуде жұмысты сапалы жаңа деңгейге жеткізеді деген сөз.
Павлодар облысы
