Оның салдарын жойғаннан алдын алған тиімді
Бірер күннен кейін төрін жылқы жылына ұсынатын 2013 жыл еліміздің құтқарушылары мен өрт сөндірушілеріне оңай жыл болған жоқ. Жыл бойы түрлі табиғи және техникалық төтенше оқиғалардан көз ашпаған Төтенше жағдайлар министрлігінің қызметкерлеріне тәулігіне 150-ден 240-қа дейінгі шақырымға шығуға тура келген. Бұл жайында кеше Президент жанындағы Орталық коммуникациялар қызметінде журналистермен кездескен Қазақстан Республикасы Төтенше жағдайлар министрі Владимир Божко хабарлады.
* Сақтансаң – сақтайды
Оның салдарын жойғаннан алдын алған тиімді
Бірер күннен кейін төрін жылқы жылына ұсынатын 2013 жыл еліміздің құтқарушылары мен өрт сөндірушілеріне оңай жыл болған жоқ. Жыл бойы түрлі табиғи және техникалық төтенше оқиғалардан көз ашпаған Төтенше жағдайлар министрлігінің қызметкерлеріне тәулігіне 150-ден 240-қа дейінгі шақырымға шығуға тура келген. Бұл жайында кеше Президент жанындағы Орталық коммуникациялар қызметінде журналистермен кездескен Қазақстан Республикасы Төтенше жағдайлар министрі Владимир Божко хабарлады.
Алматы, Шығыс Қазақстан мен Павлодар облыстарының таулы аймақтарындағы қар көшкіні салған әлек пен Оңтүстік Қазақстан, Қарағанды, Батыс Қазақстан және Қостанай өңірлеріндегі күннің күрт жылынуымен жағаласа келген табиғи апаттарға тоқталған Төтенше жағдайлар министрі Жамбыл облысы мен Тараз қаласында ұйытқып соққан қатты желдің зардаптарын жою жұмыстары жайлы да айтып өтті. Естеріңізде болса, жылдамдығы секөнтіне 52 метрге жететін дүлей дауыл мыңдаған тұрғынды жылу мен жарықсыз ғана емес, баспанасыз да қалдырған болатын.
Бір сәтте 21 адамның өмірін жалмаған Көкшетау – Алматы бағытындағы ұшақ апатының ауыр қайғысын да ел жадынан әлі шығара қойған жоқ. Түрік «Скай Эйрлаинс» әуекомпаниясының банкротқа ұшырауына байланысты Анталияда еріксіз «қаңтарылып» қалған қазақстандық жолаушыларға көмек қолын созу кезінде де талай кедергілер болғаны баршаға белгілі.
Табиғаттың тосын мінезінен ғана емес, техникалық ақаудан та туындаған осы төтенше жағдайлардың барлығы өрт сөндірушілер мен құтқарушыларға біраз салмақ салды. Түптеп келгенде, бұл апаттар тек Төтенше жағдайлар министрлігіне ғана емес, құзырлы органдардың кез келгеніне қауырт жұмысты үйіп-төккені анық.
Нақты деректермен сөйлеген Владимир Божко осы жылдың 11 айында ТЖМ-нің күш құрылымы 51 мыңнан астам апаттық-құтқару жұмысына қатысқанын айта келіп, 6236 адамның құтқарылғанын хабарлады. Апатты оқиғалар кезінде 3 мыңнан астам жәбірленушіге алғашқы медициналық көмек көрсетіліп, төтенше жағдай ошағынан 6277 адам шығарылған.
«Тілсіз жаумен арпалысып, табиғаттың қатал мінезіне тойтарыс беріп жүрген қызметкерлеріміздің кей іс-әрекеттерін нағыз ерлік, көзсіз батырлық деп бағалауға болады. Бұл сөзімізге ағымдағы жылы мемлекеттік марапаттарға ие болған 26 ТЖМ қызметкерінің орден- медальдары дәлел бола алады», деді министр.
Брифинг барысында В.Божко таяуда ғана Үкіметтің кеңейтілген отырысында ел Президенті Нұрсұлтан Назарбаевтың құқық қорғау органдарының кәсіпкерлік қызметке араласпауын және бизнеске әкімшілік қысым көрсетуін азайту туралы тапсырмасының орындалу барысына да тоқталып өтті. «Естеріңізде болса, бұл мәселеге Елбасы Қазақстан Республикасы Президентінің «Алтын сапа» арнайы сыйлығының лауреаттарын марапаттау рәсімінде де ерекше екпін берген болатын, – деді ТЖ министрі. – Осыған орай бұл бағытта бүгінгі таңда жедел жұмыстар қолға алынды. Нақтырақ айтар болсақ, түрлі 199 құжаттың саны 168-ге қысқартылып, бес үрдіс ескертумен алмастырылды. Сонымен қатар, өрт қауіпсіздігіне байланысты құжаттар – 9, ал өндірістік қауіпсіздікке орай іс қағаздары 10 есеге азайды».
Апаттың алдын алу, оның салдарын жоюдан әлдеқайда тиімді, ең бастысы – арзанға түсетінін айтып өткен В.Божко Мемлекет басшысының тапсырмасы бойынша жыл басынан бастап көктемгі су тасқындарының алдын алу бағытында тыңғылықты дайындықтар жүргізілгенін де мәлім етті. «Ғасыр құрылысы» атанған Оңтүстік Қазақстан облысындағы Көксарай су қоймасының көктемде су тасқынынан, аптап жазда, керісінше, қуаңшылықтан зардап шегіп келген Оңтүстік Қазақстан мен Қызылорда облыстарының ең басты түйткілдерін шешіп бергеніне ерекше тоқталған министр: «Стратегиялық маңызы бар бұл нысан 2,5 миллион халық шоғырланған екі облысты ауызсумен қамтамасыз етіп қана отырған жоқ, өңірдегі ауыл шаруашылығының өркендеуіне де оң ықпалын тигізуде», деді.
Жаңа жыл мерекесінің сәніне айналған от-шашудың қауіп-қатерін де қалтарыста қалдырмады В.Божко. «Пиротехниканы қолдану кезінде оң-солын танып болмаған баланы былай қойғанда, есі кірген үлкендердің өздері қарапайым қауіпсіздікті сақтай бермейді. Сол себепті ТЖМ қызметкерлері мереке қарсаңында өрт қауіпсіздігін сақтауға бағытталған тексеру іс-шараларының шеңберін кеңейтіп отыр. Сондықтан да ересектердің құлағына алтын сырға, сіздер көңіл көтергенмен, ойламаған жерден от шығарып жіберетін қауіпсіздіктің ешқашан қалғымайтынын естеріңізде болсын. Себебі, қауіп-қатер бір сәт те «масаймайды», деді ол әзіл-шыны аралас.
Сөз орайы келгенде айта кетейік, аяз күшіне мінгелі бері ТЖМ қызметкерлері күре жолдарда қар құрсауында қалып қойған 637 адамның өмірін аман сақтап қалған. Қыстың қаһарына іліккендердің 75-і жаздық жанар-жағармаймен ұзақ жолға шыққан Өзбекстан Республикасының азаматы.
Республика көлемінде тегін әрі тәулік бойы жұмыс істейтін бірыңғай «112» құтқару қызметінің нөмірінің бұрыннан іске қосылғанын тағы бір рет еске салып өткен В.Божко қарапайым халықтың бұл туралы біле бермейтініне қынжылыс білдірді.
Халық тарапынан үлкен сұранысқа ие болған ТЖМ-нің «Денсаулық», «Жәрдем» және «Саламатты Қазақстан» медициналық пойыздары соны техникалық құралдармен жабдықталған. Ағымдағы жылы бұл пойыздар барлық облыстың шалғай жатқан 276 бекет тұрғындарына, нақтырақ айтса, 63 мың халыққа жәрдем көрсетіп, 700-ге жуық емханалық ота жасалған.
Сондай-ақ, брифинг кезінде Парламент Мәжілісінің бірінші оқылымында мақұлданған «Азаматтық қорғаныс туралы» заң жобасының басымдықтары, ТЖМ құрған шұғыл медициналық құтқару ден қоюдың бірыңғай жүйесі, Көкшетау техникалық институты базасында жаңадан ашылған «ТЖ-дағы қорғаныс», «Азаматтық қорғаныс және әскери дайындық» мамандықтары, сондай-ақ, Ресей мен Беларусь ТЖМ-нің жоғары оқу орындарында білім алып жатқан 35 қазақстандық курсант, Гватемала, Ливан, Шри-Ланка мен Ауғанстанға берілген гуманитарлық көмек жайлы да ақпар берілді.
Сөз соңында Төтенше жағдайлар министрі Владимир Божко елдегі оқыс оқиғалардың санын азайтып, алдын алудың кешенді іс-шаралары алдағы уақытта да кең көлемде жүргізілетінін айтып өтті.
Бану РАХЫМБАЙҚЫЗЫ,
журналист.
