Алматыда «Шыңға өрлеу» деп аталған әлеуметтік клуб өз жұмысын бастады. Қаланың Түрксіб ауданында орналасқан шағын орталықта аз қамтылған және көп балалы отбасылардың балалары қосымша білім алып, түрлі шығармашылық үйірмелерге тегін қатыса алады. Бастауыш мектеп жасындағы 240 өренге шақтап ашылған шығармашылық үйінде шахмат, музыка, би, бейнелеу өнері үйірмелері жұмыс істейді. Ең қызығы, мұнда келген балдырғандарға 35-40 жылдық еңбек өтілі бар зейнет жасындағы білікті мұғалімдер тәлім береді.
– Біз ең алдымен балалардың арман-тілегін орындап, шығармашылық қалауларын жүзеге асыруға көмектесеміз. Баланың ойлауы ойнау арқылы қалыптасады. Білікті мамандар әр баламен жеке-дара сөйлесіп, ой бөліседі. Біз әдейі өмірлік тәжірибесі бай қарт ұстаздарды таңдап алдық. Олар балалармен өз ата-әжесі секілді сырласады, бала жанын жақсы түсінеді. Әлеуметтік жобаның мақсаты – балаларға ұлттық танымға сай тәрбие беру әрі жағдайы төмен отбасылардың балаларын қолдау, – дейді «Шыңға өрлеу» әлеуметтік клубының директоры Шоқан Болатбеков.
Игі бастаманың қанат қағуына аудан әкімдігі мен мәслихат депутаттары, сондай-ақ жаны жомарт азаматтар қолдау көрсеткен. Мұндай орталықтар бүгінде Алматы қаласының алты ауданында жұмыс істейді. «Берсең, балаға бер» деген. Алдағы уақытта да балдырғандарға қуаныш сыйлайтын игі жобалардың қатары көбейе берсе құба-құп.
АЛМАТЫ
