Облыс әкімінің орынбасары Бақытгүл Хаменованың мәліметінше, Атырауға вакциналау басталардан бір күн бұрын «Спутник V» вакцинасының 1000 дозасы жеткізілді. Қазір вакцина Атырау қаласындағы 16, аудандардағы 8 арнайы ашылған орында салынып жатыр.
«Дәрігерлермен бірге, коронавирусқа қарсы вакцинаның екінші компонентін алдым. Вакцинация аздап ауырсынумен қатар жүрді. Бірақ бірінші кезеңнен кейін жанама әсері болған жоқ. Вакцина алу – «Covid-19» қауіпті вирусын жұқтырмаудың басты жолы» дейді Бақытгүл Хаменова.
Коронавирусқа қарсы «Спутник V» вакцинасын салдырған 73 жастағы хирург Марат Есжановтың айтуынша, жанама әсері байқалмапты.
«Мен де 1 ақпанда әріптестеріммен бірге коронавирусқа қарсы вакцинаның бірінші кезеңін алдым. Дене қызуы, әлсіздік, бас айналу секілді әсерлер, басқа да асқынулар болған жоқ. Вакцинациядан кейін 10-15 минут дәрігерлер бақылауында болдық. Кейін күнделікті жұмысымызға кірістік» дейді Марат Есжанов.
