Аймақтар • 28 Ақпан, 2021

Түркістандағы оқиға бойынша қылмыстық іс қозғалды

162 рет көрсетілді

Түркістан қаласында  бір отбасыда қайтыс болған бес адам бүгін Қызылорда облысы Жаңақорған ауданында жерленеді.  Мұндай мәліметті Түркістан облысы әкімінің бірінші орынбасары Арман Жетпісбаев брифингте мәлім етті.

- Кеше облыс басшысы Өмірзақ Шөкеев қара жамылған отбасыға барып, марқұмдардың туыстарына көңіл айтты. Қоғамдық денсаулық сақтау басқармасының психологтары  өз көмектерін көрсетуде. Марқұмдардың денелері сот медициналық сараптамадан өткізіліп, туыстарына табысталды. Жерлеу рәсіміне қажетті көмектер көрсетілуде. Облыстағы мекемелер қайғылы жағдайға тап боған отбасыға көмектесу үшін бір күндік жалақыларын аударуды ниет етіп отыр. Осы оқиғаға байланысты қылмыстық іс қоғалды. Егер тиісті қызметкерлердің кінәсі анықталса, заң аясында жауапкершілікке тартылады, - деді А.Жетпісбаев.

Еске сала кетсек, 27 ақпанда кешкісін Түркістан қаласындағы жекеменшік үйлердің бірінен иіс тиіп қайтыс болған 5 адамның денесі табылды. Қайтыс болғандар: осы үйдің 1980 жылы туған азаматшасы және оның 2004, 2006, 2013, 2016 жылы туған балалары. Кәсіпкерлікпен айналысатын отағасы бұл күні емделу мақсатында Шымкент қаласында болған.

Облыстық төтенше жағдайлар департаментінің басшысы Нұрғали Жүнісовтың айтуынша, қайғылы жағдай болған үй ирандық камин пешімен жылытылған. Болжам бойынша марқұмдар иісті газдан уланып қайтыс болған.

Түркістан облыстық Полиция департаменті бастығының бірінші орынбасары Әбдіғани Сейдуалиевтің айтуынша, қайғылы жағдай 26 ақпан күні кешкі сағат 7-8-дердің шамасында орын алған болуы мүмкін. Отбасы мүшелері  бұл кезде әлі ұйқыға жатпаған. Қайтыс болған азаматша базарда жұмыс істеген. Ертеңіне ол базарға шықпаған соң қасындағы танысы оның үйіне ұлын жіберген. Ұлы үйден ешкімнің шықпағанын айтып келген. Бұдан кейін сатушы әйел күйеуін жұмсаған. Ол үйдің терезесінен қарап, марқұм азаматшаның жатқанын көрген.

- Оқиға бойынша Қылмыстық кодекстің 292-бабының 3-бөлімімен, яғни абайсызда екі немене одан көп адамның өліміне әкеліп соққан  өрт қауіпсіздігі талаптарын бұзу бабымен қылмыстық іс қозғалды. Толық мән-жай тергеу барысында анықталады, - деді Ә.Сейдуалиев.

«ҚазТрансГаз Аймақ» мекемесінің Түркістан бойынша өндірістің филиалының басшысы Шалқар Умарбековтың айтуынша,  оқиға болған Сұлтан Бейбарыс көшесіне табиғи газ құбыры осыдан бірнеше жыл бұрын тартылған. Ал абоненттің өзі газға қосылу жөніндегі өтінішті  былтыр қарашада берген. Үйге газ құбырларын орнату жұмыстарын «ҚазТрансГаз» мекемесі емес, мердігер мекемелер ақылы негізде жүргізеді.

-Біз оларға өз тарапымыздан сілтеме немесе талаптар қоя алмаймыз. Олар өздерінің жұмысын лицензия негізінде жүзеге асырады, - деді Умарбеков.

Айта кетері,  қайғылы оқиға болған үйдегі газ құралдарының орнатылуы алдын ала өткізілген құжаттардағы схемамен сәйкес келмеген.

Соңғы жаңалықтар

Алдағы үш тәулікте күн суытады

Ауа райы • Бүгін, 11:55

Facebook атауын өзгертеді

Әлем • Бүгін, 10:15

Ұқсас жаңалықтар