Иә, Түркістан қаласында бір отбасын-да қайтыс болған бес адам Қызылорда облысы Жаңақорған ауданында жерленді. Мұндай мәліметті Түркістан облысы әкімінің бірінші орынбасары Арман Жетпісбаев брифингте мәлім етті.

– Облыс басшысы Өмірзақ Шөкеев қара жамылған отбасына барып, мар­құмдардың туыстарына көңіл айтты. Қоғамдық денсаулық сақтау бас­қармасының психологтары тиісті көмек көрсетуде. Марқұмдардың денелері сот медициналық сараптамадан өткізіліп, туыстарына табысталды. Жерлеу рәсіміне қажетті көмек көрсетілді. Облыстағы мекемелер қайғылы жағдайға тап бол­­ған отбасыға көмектесу үшін бір күн­дік жалақыларын аударуды ниет етіп отыр. Осы оқиғаға байланысты қыл­мыстық іс қоғалды. Егер тиісті қыз­мет­керлердің кінәсі анықталса, заң аясында жауапкершілікке тартылады,– деді А.Жетпісбаев.

Иә, қайғылы оқиға жөнінде деректер алғаш 27 ақпанда кешкісін мәлім болған. Түркістан қаласындағы жекеменшік үйлердің бірінен 5 адамның жансыз денесі табылды. Қайтыс болғандар: осы үйдің 1980 жылы туған азаматшасы және оның 2004, 2006, 2013, 2016 жылы туған балалары. Кәсіпкерлікпен айналысатын отағасы бұл күні емделу мақсатында Шымкент қаласында болған. Облыстық төтенше жағдайлар департаментінің басшысы Нұрғали Жүнісовтің айтуынша, қайғылы жағдай болған үй ирандық камин пешімен жылытылған. Болжам бойынша марқұмдар иісті газдан уланып қайтыс болған. Төтеншеліктер Түркістан қаласында жылыту маусымы басталардың алдында абоненттер арасында газ құралдарын пайдаланудың ережелерін сақтау жөнінде түсіндіру жұмыстары жүргізілгенін айтуда. Об­лыс­тық полиция департаменті бас­тығының бірінші орынбасары Әбдіғани Сейдуалиев қайғылы жағдай 26 ақпан күні кешкі сағат 7-8-дердің шамасында орын алған болуы мүмкін екенін айтады. Қайтыс болған азаматша базарда жұмыс істеген. Ертеңіне ол базарға шықпаған соң қасындағы танысы оның үйіне ұлын жіберген. Ұлы үйден ешкімнің шықпағанын айтып келген. Бұдан кейін сатушы әйел күйеуін жұмсаған. Ол үйдің терезесінен қарап, марқұм аза­­матшаның қимылсыз жатқанын көрген. «Оқиға бойынша Қылмыстық кодекстің 292-бабының 3-бөлімімен, яғни абайсызда екі немесе одан көп адамның өліміне әкеліп соққан өрт қауіпсіздігі талаптарын бұзу бабымен қылмыстық іс қозғалды. Сот техникалық сараптамасы тағайындалды. Толық мән-жай тергеу барысында анықталады», деді Ә.Сейдуалиев.

Оқиға орнын Төтенше жағдай, полиция, газ тарату мекемесі қызметкер­лерімен тексеру барысында камин түріндегі пеш орнатылған бөлме үйдің ортасында орналасқаны, екі жағында екі бөлме болғаны анықталған. «Мұқият тексеру барысында орнатылған пешке гофр­ленген бұрғыш қосылғаны анықталды. Ол жану өнімі пештен 1,5 метр қа­шық­тықта қабырғадағы тесік арқылы көшеге шығарылған. Сыртқы жағынан гофрленген розетка 5-7 сантиметрді ғана құрайды, осылайша қатты желдің әсерінен пештегі тартылыстың нашарлауына ықпал етіп, улы газ бөлме ішіне тарауына әкеп соғуы мүмкін»,  деді облыстық ТЖД басшысы Нұрғали Жүнісов.

Сондай-ақ брифингте «ҚазТрансГаз Аймақ» мекемесінің Түркістан бойынша өндірістік филиалының басшысы Шалқар Омарбеков оқиға болған Сұлтан Бейбарыс көшесіне табиғи газ құбыры бірнеше жыл бұрын тартылғанын айтты. Үйге газ құбырларын орнату жұмыс­тарын «ҚазТрансГаз» емес, мердігер мекемелер ақылы негізде жүргізеді. Пештің қаншалықты талапқа сай екенін анықтау мақсатында сот-техникалық сараптама жүргізілмек. «Отбасы 2020 жылы қарашада техникалық шарт алуға ұсыныс берген. Техникалық шарт аясында құжаттар дайындалып, 27 қа­рашада газға қосу туралы өтініш берді. Сол құ­жаттар негізінде газ пайдалануға рұқ­сат берілді. Монтаждау жұмыстарын газдандырумен айналысатын «Газ құ­быры-2050» деген мердігер мекеме жү­зеге асырды. Лицензия негізінде жүзеге асырылғандықтан, мердігерлер газды қосып беру, қазандықты газға қосу жұмыстарын өздері жүзеге асырады. Оқиға туралы хабар түскен соң біз­дің мамандар барып көріп, ирандық пештің орнатылғанын анықтады. Ол қазандық ретінде жылытады және тамақ істеуге мүмкіндік береді. Азаматтар кейде соны қолданады, бірақ ол өте қауіпті қазандық болып саналады. Со­дан кейін мамандар кеңсеге барып құ­­жаттарды тексерді. Үйдегі жағдай мен құжаттардың сәйкес емес екені анық­талды, – деді Ш.Омарбеков. – Ма­ман­дар оқиға орнында үш нүкте бар еке­нін анықтаған. Жатын бөлмедегі бір нүкте газға қосылмаған. Екеуіне газ плита мен ирандық пеш қосылып тұр­­ған. Әр бөлмеге бөлек-бөлек газ құ­быры тар­тыл­ған. Ішінде бір қазандық қосулы тұр. Сол қазандықтан улы заттар бөл­меге таралуы мүмкін.

Қалай десек те, бүкіл елдің қабыр­ғасын қайыстырған қайғылы оқиғаның мән-жайын тексеру жұмыстары толық анық­тап береді. Яғни өрт қауіпсіздігі талаптарының сақталуын анықтау мақ­сатында сот-техникалық сараптама жүр­гізіледі.

Түркістан облысы