Қоғам • 02 Наурыз, 2021

Қайырымды да батыл жандар құрмет төрінде

26 рет көрсетілді

Өзгенің қайғысын бөлісуге, риясыз көмекке дайын, игі істердің бастаушысы болатын жандар аз емес. Мейірімді, бауырмал, қайырымды, жомарт адамдар – кез келген қоғамның негізгі тірегі. Осы орайда Нұрсұлтан Назарбаев қоры мен Қазақстанның іскер әйелдер қауымдастығы «Қайырымдылық керуені» республикалық байқауын үшінші жыл қатарынан ұйымдастырып жатыр. Аталған іс-шараға Алматы қаласының әкімі Бақытжан Сағынтаев қатысты. Байқау қайырымдылық идеяларын насихаттауға, белсенді азаматтық бастаманы дамытуға бағытталған.

Думан АНАШ

Жобаға қатысушылар арасында ұдайы мұқтаж адамдарға көмектесіп, экологиялық мәселелерді шешіп, әлеуметтік кәсіпкерлікті жүзеге асырып жүрген түрлі салада қызмет ететін кәсіпкерлер, қоғамдық ұйым өкілдері, білім беру саласының мамандары, ерекше қажеттіліктері бар адамдар, құқық қорғау органдарының қызметкерлері, журналистер мен блогерлер бар. Дәстүрлі түрде байқау жеңімпаздарының есімдері бес аталым аясында анықталады: «Асар», «Туған жер», «Мейірім жолында», «Батыл жүрек», «Қайырымдылық тарихы». Алайда биыл комиссия мүшелері тағы екі номинация – «Бала жүрегі» және «Жануарға мейірім» аталымдарын тағайындау туралы шешім қабылдады.

Байқаудың маңызын атап өткен Нұрсұлтан Назарбаев қорының директоры Дариға Назарбаева байқауға қатысуға ниет еткен мейірімді, қайырымды адамдардың саны жыл сайын көбейіп келе жатқанына назар аударды. Алғашқы байқау ұйымдастырылғаннан бергі үш жылда қатысушылар саны жеті есеге артып, 2020 жылдың өзінде 667 адамды құраған.

– Биылғы «Қайырымдылық керуені» ерекше. Коронавирус пандемиясы, карантиндік шектеулер әрқайсымыздың өмірімізге әсер етті. Бүгінгі шараға қатысушылар арасында осы қиын-қыстау кезеңде өз күші мен мүмкіндігін аямаған жандарды ерекше атап өткім келеді, – деді қор директоры.

Қор жетекшісінің айтуынша, әрбір оқиғаның артында адам басына түскен қайғы мен мұң, мейірімділік пен махаббат тұр. Мейірімділік пен ынтымақтастық бірлескен кезде, төтеп бере алмайтын қиындық болмақ емес.

«Байқауға қатысушылар өзгелерге жақсылық жасаудан ләззат табатын, өмірге құштар, кең жүректі жандар. Олар өздерінің жарқын іс-әрекеттерімен өскелең ұрпаққа үлгі болып қана қоймай, мейірімді болуға ынталандырады», деді Дариға Нұрсұлтанқызы.

Жеті аталымның әрқайсысы бойынша жеңімпаздар мен жүлдегерлер анықталды. Сонымен қатар жүлделі орындарға ие болмаған үздік финалистер ынталандыру сыйлығын иеленді. Атап айтқанда, «Асар» номинациясы бойынша – қазақстандық және шетелдік қоғам арасында ұлттық қолөнер бұйымдарын дайындау дәстүрін танымал етуге қосқан ерекше үлесі үшін Семей қаласынан Абылайхан Асылбайға тапсырылды. «Туған жер» номинациясы – көп балалы отбасыларға көмектескен, сондай-ақ коронавирус пандемиясы кезінде адамдарды құтқаруға атсалысқан (17 млн теңгеге 185 ӨЖЖ аппараты, дәрілік заттар сатып алынды, медициналық қызметкерлерді тамақтандыру ұйымдастырылды) Семей қаласының тұрғыны Дәурен Күлдішевке, ал «Батыл жүрек» номинациясы – 4 жастағы баланың бауырын ауыстыруға донор болған Қостанай облысының тұрғыны Алексей Сычуговқа, «Мейірім жолында» номинациясы – көп балалы және аз қамтылған отбасыларға тұрақты негізде материалдық көмек көрсеткені үшін (Қор 20 мыңнан астам отбасыға көмектесті, 100 тоннадан астам азық-түлік таратты) Нұр-Сұлтан қаласының «Шапағат» қайырымдылық қорына берілді. Сондай-ақ Батыс Қазақстан облысының «Сырым елі» қоғамдық-саяси газеті «Қайырымдылық тарихы» номинациясы бойынша үздік деп танылды. Басылым облыс тұрғындарының проблемаларын жариялап, оны шешуге септігін тигізеді. Газеттің белсенді позициясы арқылы 13 оттегі концентраторы мен дәрі-дәрмектер, екі отбасына үй сатып алынды. Ал «Бала жүрегі» номинациясында Батыс Қазақстан облысынан келген 16 жастағы Дана Өтебаева үздік атанды. Марапат өрт кезінде 3 баланы құтқарудағы ерен ерлігі үшін берілді. «Жануарға мейірім» номинациясында Өскемен қаласынан келген Борис Щербаков атап өтілді. Ол Шығыс Қазақстан табиғатын дәріптеуге үлкен үлес қосты, ботаника, фаунистика, экология бойынша 200-ге жуық ғылыми жұмыс пен кітап шығарды. Шешек шатқалында «Мектеп жанындағы экологиялық қорық» ұйымдастырды, онда жас натуралистер экологиялық практикадан өтіп, өздерінің ғылыми ізденістерін жүргізе алады.

Айта кетелік, «Қайырымдылық керуені» – игі істер жасайтын адамдарды анықтауға және ынталандыруға бағытталған жоба. Жобаны іске асырудың үш жылында осындай 1 мыңға жуық қайырымды адам анықталды.

Күннің маңызды және өзекті жаңалықтарын «Егемен Қазақстан» телеграм каналынан оқыңыз