Қоғам • 04 Наурыз, 2021

Бейбіт күннің батырлары марапатталды

17 рет көрсетілді

Ізгілік пен мейірім әлемді құтқарады. Қоғамда өзгенің өмірі үшін өз басын қатерге тігетін бейбіт күннің қаһармандары аз емес. Олардың еңбегін елеп, басқаларға үлгі ету жақсылыққа жол ашады. Алғашқы қазақстандық «Adam Bol Awards» сыйлығы өмірде ерлікке әрдайым орын бар екенін өз ісімен шынайы көрсете білген жандарға тапсырылды.

«Adam Bol Awards» қазақстандық жүлдесі ешқандай қиындықтан қорықпай, нағыз батырлықтың ерен үлгісін көрсеткен азаматтарға арнал­ған. Жүлде лауреаттары адам бо­йындағы мәрттік, жомарттық, ерлік, мейірім мен әділдік, махаббат пен даналық, сенім мен үміт сияқты асыл қа­сиеттерімен ерекшеленді. Алау­ла­ған оттың ішінен алты баланың өмірін арашалап қалған Дәурен Рымқұлов туралы журналис­тер қауымы жарыса жазған болатын. Атаулы сыйлыққа ие болғандардың ішінде ол да бар. Сондай-ақ жанып жатқан ангардан 22 итті аман алып шығып, өзі көк түтінге уланып ауруханадан бір-ақ шыққан хайуанаттар құқын қорғаушы Сергей Снегирев те лауреаттар қатарынан табылды.

Көпшіліктің дауыс беруі мен сарап­шылар кеңесінің шешімі бо­йынша жеңімпаз атанған Надир Омарғазиев, Иманғали Баймырза, Андрей Петров, Ақбота Аманғалиева, Ержан Амарханов, Ардақ Байманасов, Артем Боровиков, Александр Шахов, Әлиакбар Юлдашев, Александр Жұмабаев секілді азаматтардың әрбірі құрметке лайық. Қоғамның сан саласында еңбек ете жүріп, айналасына жарқын үлгі көрсеткен олардың ішінде мектеп оқушысы да бар.

Жеңімпаздарды марапаттау рәсі­мін­де сөз алған Алматы қала­сы­ның әкімі Бақытжан Сағынтаев: «Қаһармандар арамызда жүр. Адамға жақ­сылық жасау үшін көп нәрсенің қажеті жоқ, кішкентай мейірім болса жеткілікті. Сыйлық лауреаттарының әрқайсысы – құрметке лайық әрі қоғамға қызмет етудің, жанқиярлық пен батылдықтың үлгісін көрсеткен жандар», деп атап өтті.

Жобаның құрылтайшысы – қоғам қай­раткері, «Жандану әлемі» қайы­рым­дылық қорының негізін қа­лаушы Әлия Назарбаева. Лауреат­тар­ды қолдап, жылы лебіз білдіру үшін марапаттау кешіне Қазақстанның ең жас композиторы Нұрәли Бейсеқожа, Mezzo тобы, «Славянский базар в Витебске» байқауының жеңімпазы Әмре, Қазақстанның еңбек сіңірген қайраткері Майра Мұхаммедқызы, Қазақстанның еңбек сіңірген қай­рат­кері Сүндет Байғожин және тағы басқалар қатысты.

 

АЛМАТЫ

 

Соңғы жаңалықтар

Асыл ағаның шарапаты

Руханият • Бүгін, 00:08

Құймақұлақ

Руханият • Кеше

Газ бағасы неге қымбат?

Аймақтар • Кеше

Ұқсас жаңалықтар