Қазақстан • 10 Наурыз, 2021

Мемлекет қаржысына бизнес бастауға бола ма?

26 рет көрсетілді

Елімізде бизнес бастауға ынталандыратын мемлекеттік бағдарламалар мен гранттар бар екені белгілі. Адамдар осы жайлы естігенімен, шынайы іске келгенде күмәнданып та жатады. Алматы қалалық кәсіпкерлер палатасының басшысы Айтуар Қошмамбетовтің айтуынша, мемлекет грантын алып, жеке кәсіп бастауға мүмкіндік мол.

Абай ҚАЗБЕКҰЛЫ

– Егер тауар сатсаңыз, тауар қайдан келеді, оны қалай қабылдау, рәсімдеу, сату, қайда сақтау қажеттігін білуіңіз керек. Осы процестердің бәрін игеріп, барлық сұрақ жауабын білген соң, қызметіңізді бөліп, кәсіби мамандарды жалдай аласыз, – дейді А.Қошмамбетов.

Палата басшысының сөзінше, әрбір бағыт бойынша нақты оқу курстары бар. Мәселен, кәсіпкер SMM немесе бухгалтерлік есептілікті білсе, Atameken Аcademy порталынан оқуға қатысуға болады.

– Бұдан бөлек, «Бастау Бизнес» арнайы бағдарламасы бар. Үш апта бойы тыңдаушы кәсіпкерлік негіздерін оқиды, содан кейін 200 АЕК көлемінде грант немесе жылдық 6 пайызбен несие алуға мүмкіндігі болады. Сонымен қатар 5 млн теңгеге дейін инновациялық грант алуға да мүмкіндік берілген, – дейді палата басшысы.

2021 жылы «Бастау Бизнес» бойынша Алматыда 2 мың адамды оқыту жоспарланып отыр. Сонымен қатар құны 200 АЕК (583 мың теңге) болатын 1 мың грант қарастырылған. Бұл жобаға қатысып, кәсіпкерлік негізін игергісі келген әрбір азамат жеке куәлігін алып жұмыспен қамту орталығына баруы шарт.

Қалалық жұмыспен қамту орталығының директоры Диляра Иманқұлованың айтуынша, 2020 жылы шаһарда 34 855 адам жұмысқа тұрған. Оның 10 мыңнан астамы «Жұмыспен қамтудың жол картасы – 2020» арқылы кәсіп тапқан. Әсіресе, IT саласында сұраныс артып келеді. 2021 жылы 20 мыңнан астам адамды жұмысқа орналастыру жоспарланып отыр.

АЛМАТЫ

Күннің маңызды және өзекті жаңалықтарын «Егемен Қазақстан» телеграм каналынан оқыңыз