Саясат • 17 Наурыз, 2021

Есірткі қылмысы үдеп тұр

33 рет көрсетілді

Қолданылған шараларға қарамастан, есірткі қылмысы Жамбыл өңірінде әлі де жиі кездесуде.

Облыстық полиция де­пар­таменті Есірткі қылмысына қар­сы іс-қимыл басқармасының бастығы, полиция полковнигі Асқар Жұмабековтің айтуынша, өткен жылы өңірде 815 есірткі қылмысы тіркеліпті. Оның қа­тарында 120 дерек есірткі заттарын сату болса, 68 дерек оны аса ірі мөлшерде сақтау бойынша анықталған. Сондай-ақ аймақта есірткі контрабандасының 6 дерегі, құрамында есірткі заты бар өсімдіктерді өсірудің 26 дерегі және үй қабырғаларына граффити-жазуларды жазу ар­қылы есірткі затын насихаттау мен жарнамалаудың 3 дерегі тір­келген. Ал заңсыз айналымнан 3 тонна 277 кило әртүрлі есірткі заттары тәркіленген.

Сонымен қатар Жамбыл облы­сының аумағында шамамен 251 гектар жерді жырту, шабу, өртеу және гербицидтерді қолдану ар­қылы 50 тоннадан астам жабайы қара сора жойылған.

Дегенмен де, қоғамда есірткі дейтін есті алатын дерттің жа­йылып кетуі көпшілікті алаң­дататын мәселе. Бұл бір жа­ғынан құмарлық болса, екінші жағынан пайда табудың да төте жолы болып тұрғаны жасырын емес.

Мәселен, жуырда ға­на рес­­публикалық кең ауқым­ды «Допинг» жедел-іздес­ті­ру іс-шаралары аясында Жам­­­был облысының Поли­ция де­пар­таменті Есірткі қыл­мы­сына қарсы іс-қимыл бас­қар­ма­сының қызметкерлері Шу ауданынан 38 жастағы әйелді ұстаған болатын. Тексеру барысында «Бони» атты қызметтік ит күдіктінің тұрғын үйінің аумағында орналасқан сарайдан жалпы салмағы екі килодан асатын өсімдік тектес затты тапқан. Табылған есірт­кі заты тәркіленіп, сотқа дейінгі сараптамаға жіберілген. Ұс­талған әйел кінәсін мо­йындаған.

Жалпы, осы жылы бір жа­рым айға жуық уақыт ішінде өңірде есірткі бойынша құ­­қық­ бұзушылықтың 154 дерегі тіркеліпті. Оның ішінде 34 де­рек есірткіні сату, 15 дерек есірт­кі заттарын аса ірі мөл­шер­де сақтау болса, есірткі құ­­рал­дарының контрабандасы бойынша 2 дерек және 103 теріс қылықтар анықталған. Со­ны­мен қатар жедел іздестіру іс-шараларын жүргізу барысында заңсыз айналымнан 95 килодан астам әртүрлі есірткі заттары тәркіленіпті. Оның ішінде 570 грамм героин, 60 килодан астам гашиш және 29 килодан астам марихуана бар.

«Есірткі қылмысына қарсы іс-қимыл бойынша біздің бас­ты мақсатымыз – облыс тұр­ғындары мен жастардың арасында нашақорлықтың алдын алуға назар аудару. Бүгінгі таңда күнделікті мониторинг жүргізу барысында ғаламтор кеңістігінде синтетикалық есірткі заттарын таратумен айналысатын 6 ғаламтор сайты анықталып, бұғатталды. Тараз қаласының үйлері мен ғимараттарының қабырғаларында жазылған 260-тан астам граффити-жазулары жойылды», дейді басқарма бастығы Асқар Жұмабеков.

Бүгінде ел арасында есірткі бақшасы туралы да жиі айтылады. Бұл мәселе төңірегінде Асқар Жұмабеков 733 түп есірткі заты бар өсімдіктердің жойылғанын жеткізді. Ал Есірткі қылмысына қарсы іс-қимыл бас­қармасының қызметкерлері «Допинг» республикалық жедел-алдын алу іс-шарасын өт­кізген бес күннің ішінде 42 есірт­кі қылмысын анықтаған. Бұл мәліметтерге қарап, өңірде есірткі мәселесінің өзекті екенін байқауға болады. Аймақта қа­уіпті құбылыстың алдын алу мақ­­сатында да жоғары оқу орын­­дарында, колледждер мен мек­тептерде жастармен жиындар жиі ұйымдастырылуда. Өңір полицейлерінің бастамасымен басқа да шаралар қабылдануда. Бірақ есірткі қылмысының жиі тір­­келуі әлі де өңірдегі өзекті мә­­селенің бірі ретінде қалып отыр.

 

Жамбыл облысы

 

Соңғы жаңалықтар

Ақыл алыбы

Руханият • Кеше

Шығыстанудың биік шынары

Әйел әлемі • Кеше

Бейқамдық белең алып тұр

Коронавирус • Кеше

Үлкен қалада адасу

Руханият • Кеше

Ұқсас жаңалықтар