Ер балаға жиі қойылған есімдердің үштігін Айсұлтан (841) мен Нұрислам (765) толықтырса, ал қыздар арасында Асылым (1 183) мен Раяна (1 172) бекітіп тұр. 2019 жылы да ер балаға берілген осы үш есім алдыңғы қатарда болған. Бұл жылы 4 268 балаға Әлихан,
3 270 сәбиге Айсұлтан, 2 528 ұлға Нұрислам есімі қойылған. Ал қыздар есімінің үздік үштігінде сәл өзгеріс бар. Себебі былтыр Раяна (5 601) бірінші орынға шығып, екінші орынға Медина (5 320 қыз) тұрақтаған болса, 4 510 «кесте тігерге» Айзере есімі берілген.
Биыл Алаш қайраткері Әлихан Бөкейханның туғанына 155 жыл толды. Жоғарыдағы сан саналы ғұмырын ұлтына қызмет етуге арнаған ұлы тұлғаның есімін осылай да ұлықтауға болатынын аңғартады. Мақсаты елдік мүдде болған көсемнің Алаш жұртымен мәңгі жасауы деген осы болар! Ал «Пайғамбар қаласының» қасиетін арттырған Медина-Мәдиналар көбейсе, мұсылмандығымыздың мұқалмасы анық. Екі жылдан бері қыз балаға ең көп қойылып жүрген есімдердің бірі – Раяна. «Ар-Райян» – мұсылмандар кіретін Жәннат қақпаларының бірі. Ұрпағының салиқалы, қызының көркем мінезді болып өсуін тілеген ата-ананың сәбиіне бұл есімді ырымдап қоятыны сөзсіз. Айсұлтан мен Асылым да мәні терең, мағынасы мол, ұлт ерекшелігін білдіретін есімдер.
Рас, әр заманның талабы мен сұранысы есім таңдауға да әсер етеді. Балаға ат қою – ұлағатты дәстүр екенін ескерсек, бұл салтқа салғырт қарамаған дұрыс. Себебі, адамның аты – таңдалған тағдыры іспетті.
Бізді ел егемендігінің ордалы жасында тарихи тұлғалардың есімін жаңғыртып, имандылықтан нәр алып, рухани болашаққа бет түзеген Қазақ елінің сәбиіне есім қоюға ерекше мән бергені қуантады. Ал қазіргідей алмағайып заманда Әлихандарымыз көбейсе, Қазақ елі алған бағытынан адаспайтыны анық.
