Еш адамның ұлтына, сеніміне қарамай, қол алысып құрмет көрсететін керемет үрдіс бүгінде бүкіл елімізге тарап кеткені рас. Әсіресе Батыс Қазақстан облысындағы Қазақстан халқы Ассамблеясының мүшелері осы мерекені Орал қаласында мәнді, мағыналы өткізді. «Жаңа өмір, жаңа күнмен көрісу» атты шара аясында облыс орталығында тұратын еңбек ардагерлерінің үйіне барып, арнайы сәлем берген бір топ жастар дәстүрлі мерекенің шығу тарихы мен жөн-жобасын үлкендерден сұрап білді.
Ассамблеяның Орал қаласы шағын аудандары бойынша Қоғамдық келісім кеңесінің төрағасы Қанат Оразғалиев ақсақал айтулы мерекеге барынша дайындалған екен. Ұлттық киімін киіп, келген қонақтарды құшақ жая қарсы алған қария жастарға ақ батасын жаудырып, ортақ Отанымыз – Қазақстан Республикасында татулық пен дәстүр сабақтастығы сақталса, еліміздің болашағы баянды болатынына сенетінін айтты.
Бұдан кейін жастарды белгілі еңбек ардагері, Мұстахим Ықсанов атындағы қоғамдық қордың төрағасы Асқар Атаев ақсақалдың дәмге толы дастарқаны қарсы алды. Сексенге келіп қалса да сергектігін жоғалтпаған ақсақал кейінгі ұрпаққа үлгі болатын өсиетін аямады.
Ассамблеяның Қоғамдық келісім кеңесінің мүшесі, елге еңбегі сіңген математик-мұғалім Мақсот Рахимбердин әлі күнге дейін балаларды математикаға және шахматтың қыр-сырына баулып келеді. Шаңырағына көрісе келген түрлі ұлт жастарын қуана қарсы алған Мақсот Қуанышұлы «Жаңбырменен жер көгерер, батаменен ел көгерер» деген қазақ нақылының мәнін түсіндіріп, келгендерге шынайы батасын берді.
– Осы шараға қатысқаныма өте қуаныштымын. Өзім Хамза Есенжанов атындағы Батыс Қазақстан облыстық балалар мен жасөспірімдер кітапханасында қызмет еткендіктен, туған жерге, Отанға деген құрмет бала күннен қалыптасатынын жақсы білемін ғой. Елге еңбегі сіңген аға буынмен жиі көрісу жастарға өте пайдалы болды. Оның үстіне пандемияның кесірінен мұндай мағыналы кездесулерге сусап қалып едік, – дейді кітапханашы, «Кітапхана ісінің үздігі» медалінің иегері Сергей Быков.
