Сапар барысында қонақтар Шахмардан Есенов атындағы Каспий технологиялар және инжиниринг университетінің кітапханасында «Парасат жолы» орталығын салтанатты түрде ашты.
42 жылдық тарихы бар, заманауи технологиялармен жабдықталған білім ордасында 7 мыңнан астам студент білім алуда.
Парасат жолын ұстанған оқу орны «ашықтық, ықылас, креативтілік» сынды құндылықтарды ұлықтайтын білім ордасы.
Аталған орталық адалдық, парасаттылық, әділеттілік қағидаттарын қалыптастыруға, сондай-ақ ұлттық мәдениет пен руханият құндылықтарын қоғамда ілгерілетуге бағытталған тың жоба.
Университет қабырғасында оқытушылық-профессорлық құрамы, студенттер мен облыстың 51 білім ордасы басшыларының қатысуымен өткен келелі кездесуде Жазира Жылқышиева сыбайлас жемқорлыққа қарсы саясаттың жүзеге асырылуы, заңнамалық өзгерістер, сыбайлас жемқорлыққа қарсы мәдениетті қалыптастырудағы ілгерілеулер жайлы сөз қозғады.
Сәдібек Түгел ұлттық мәдениет пен руханият құндылықтарын жастар арасында дәріптеу маңыздылығын атап өтті және «Біздің діліміз – ол біздің психологиямыз, менталитетіміз, пейіліміз бен пиғылымыз, соны өзгерту керек», деді ол өз сөзінде.
Бұдан бөлек, еркін форматта қонақтардың қатысуымен өткен жиында осыдан 3 апта бұрын бастау алған «AntiParaCraft-2021» студенттік квест ойындарының жеңімпаздары марапатталды.
Кездесу қатысушылардың көңілінен шықты, ал қонақтар сапарын Мұнайлы ауданына жалғастырды.
