Қоғам • 26 Наурыз, 2021

«Қорқамыз бір күні құрылыс тоқтай ма деп...»

142 рет көрсетілді

Басқа өңірлердің тіршілігінде қандай да бір мәселе туындаса, биліктің құлағына жетпей жатқан шығар деп ойлауымыз кәдік. Бірақ күллі елдің назарындағы елордада да түйіні шешілмей жатқан мәселелер баршылық. Соның бірі – үлестік құрылыс проблемасы. Нұр-Сұлтан қаласында он жылдан бері аяқталмай жатқан тұрғын үйлер бар.

Елорданың алғашқы қадасы қағылып, әкімшілік нысандар бой көтере бастаған кезде бас қалада жаппай тұрғын үйлер де салына бастады. Алғашында құрылыс жұмыстары қызу жүрді. Тұрғын үйлер салу тоқтаған жоқ. Бірақ кейін дағдарысты жағдайларға байланысты сала баяу­лай бастады. Ақшаға құ­нығып, азаматтардың тір­нек­теп жинаған ақшасын алдын ала алып алған компаниялар тығырыққа тірелді. Екі ортада ел азаматтары үйсіз қалды. Соңында мемлекеттің көмегімен біраз құрылыс аяқталды. Бірақ бұл жағдай да жұртшылыққа сабақ бола қойған жоқ. Күрмеулі құрылысқа ақша салмаңдар дегенге құлақ аспағандар тағы да осы қиындыққа тап болды. Кейін құрылысы аяқталмай, ұзаққа созылған кешендерді қалалық әкімдік қолына алды. Бүгінде елордада он жылдан бері құрылысы бітпей жатқан тұрғын үйлер бар.

Айталық, «Жеті жол» тұрғын үй кешенінің салынып болмай жатқанына он жыл толды. Мұндағы үлескер саны – 600-ге жуық. Қала әкімдігінің ресми сайтындағы мәліметке сүйенсек, бұл үйдің инженерлік желілеріне жобалау-сметалық құжаттаманы түзету бойынша жұмыстар жүргізілген. Тере­зе­лерді орнату, инженерлік желі­л­ерге қосу сынды жұмыстар жалғасып жатыр.

«Сақалды құрылысқа» ай­нал­ған тағы бір кешендер − «Зере-1» және «Ақерке-2». Ал­ғаш­қы­сында 200-ге жуық үлескер бар. Бірінші кезекте үйге де, инженерлік желілерге де барлық жобалау-сметалық құжаттама дайындалған. Алға­шында мұнда үйдің қаңқасы ғана болған. Енді тұрғын үй кешенінің қасбеті жөнделген, терезелері, есіктері, лифтісі орнатылған. Сонымен қатар ішкі және сыртқы әрлеу жұ­мыстары жүргізіліп, суға, электр энергиясына, жылуға және кәрізге қосылған екен.

«Ақерке-2» тұрғын үй кеше­нінің тұрғындары да жеті жылдан бері үйін күтіп жүр. Ке­шеннің қаңқасы аяқталып, тере­зелері мен есіктері салыныпты.

Нұр-Сұлтан қаласының әкімі Алтай Көлгінов Instagram парақшасында құрылысы ұзақ­қа созылған тұрғын үй ке­шен­­дерінде жүріп жатқан жұ­мыс жөнінде айта келіп, «Жеті жол», «Зере-1», «Ақерке-2» тұрғын үй кешендеріне бар­ғанын, пандемияға қара­мастан, құрылысты тоқтатпас үшін қолдан келген мүмкіндіктер жасалғанын жеткізді. Жоғарыда аталған үйлер осы жылы пайда­ла­нуға берілмек.

Жақында қала әкімдігі құ­ры­­­лысы көпке созылған, талай адам үздігіп күтіп жүрген «Шы­ғыс» тұрғын үй кешенінде де үлкен сең қозғалғанын айтып, тұрғындарды қуантып қойды. Бұл көп қабатты тұрғын үй ке­шені бірнеше блоктан тұрады. Үлескерлердің жалпы саны 2 мыңнан асады. Әкімнің айтуын­­ша, барлық блокқа қаржы бө­лін­ген техникалық аудит жүр­гізілген, мердігерлері де анық­талған.

Жалпы соңғы 1,5 жылдың ішінде елордада құрылысы ұзаққа созылған нысандардың саны екі есе қысқарыпты. Ұзаққа созылған әрбір құрылыстың тұрғындары бүгінде үйін сарыла күтіп жүр. Көбі қазір жү­рек­­сініп қалған. «Бір күні құ­рылыс жұмысы тоқтап қалама деп қорқамыз» дейді. Өйткені салынып жатқан әр үйдің артында бір отбасының тағдыры тұр. Құрылысы ұзаққа созылған үйлердің тұрғындары сол кездегі сәбиіміз бүгінде үлкен азамат болды, тіпті немере сүйдік деп отыр. Тіпті көптен күткен үйін көре алмай, өмірден озғандар да бар...

 

Нұр-Сұлтан

 

Соңғы жаңалықтар

Ақыл алыбы

Руханият • Кеше

Шығыстанудың биік шынары

Әйел әлемі • Кеше

Бейқамдық белең алып тұр

Коронавирус • Кеше

Үлкен қалада адасу

Руханият • Кеше

Ұқсас жаңалықтар