Экономика • 02 Сәуір, 2021

Кәсіпорын ашылса, жұмыссыздық азаяды

260 рет
көрсетілді
2 мин
оқу үшін

Елдегі тиімді саясаттың нәтижесінде Шымкентте шағын және орта кәсіпкерліктің көкжиегі кеңейіп келеді. Әлеуметтің әл-ауқатын көтеретін ауқымды жобалар жыл өткен сайын жеміс беріп, шаһар республикадағы кәсіпорыны көп өңірге айналуда. Соңғы жылдары отандық ірі компаниялардың бірегейі NURTAU distribution company ЖШС мен «КАЗТЕХНИКАС» ЖШС-ның Шымкент нарығына енуі, қала аумағында өндіріс ошақтарын салуы соның дәлелі болса керек.

Кәсіпорын ашылса, жұмыссыздық азаяды

Бүгінде жылына нарыққа 1 млн-нан астам шоколадты кәмпит өндіретін  кәсіпорын «Тассай» индустриялы ай­ма­ғында орналасқан. Шо­коладты кәмпит және сағыз өндірумен айналысатын зауыт 1,2 гектар аумақты алып жатыр. 2019-2020 жылдары құрылысы қызу жүрген кәсіпорын биыл 60 азамат­ты жұмыспен қамтып, то­лықтай іске қосылып отыр. Жаңа кәсіпорынның өн­ді­рістік қуаты жылына 1,15 млн дана шоколад кәм­пи­тін, 1,8 млн дана сағыз кәм­питін құрайды. Сондай-ақ ме­кеменің Қазақстан Рес­публикасының барлық қа­ласында өкілдері, сауда командасы мен алаңдары бар. Компанияның негізгі тұтынушылары  жасөпірімдер болғандықтан, «Орбит» емес, сағыз кәмпиттер сатылады. 12 түрлі ассортименті бар. Мысалы, алма, банан, таң­қурай дәмімен ұсы­ны­лады. Бұл кәмпиттер мен сағыздар Шымкентте өндірілетін бол­ғандықтан, шетелдік баламаларынан 10 пайызға арзан.

Өнімдер MEXXI атауымен шығарылып, жергілікті базарлар мен барлық дүкен­нің сөрелеріне таратылады. 70 пайызы ішкі нарықта, 30 пайызы экспортқа жөнел­тіледі.

Айта кетерлігі, мұндағы мамандар жаңа жабдықта жұмыс істеу үшін арнайы оқы­тудан өткен. Алдағы уа­қытта компания жүгеріден жасалған, карамель және таяқ­шадағы қатты кәмпиттер өндіретін желілерді іске қос­пақшы.

«Тассай» индустриялы аймағында орналасқан тағы бір ірі кәсіпорын – «КАЗТЕХНИКАС» ЖШС. Мұн­да жарықдиодты шамдар өндіріледі. «Бизнестің жол картасы-2020» бағдарла­масымен индустриялы ай­мақтан 1,5 гектар жер бө­лінген. Құны 500 млн теңгені құрайтын бұл жоба 2020 жы­лы бастау алып, биыл іске қосылды. Қазір мекемеде 25 қала тұрғыны жұмыс жасайды. Зауыт жылына 20 мың дана жарықдиодты шам өндіруге қауқарлы. Шамдардың сапасы өндірілгеннен кейін су ішінде 5 минут тұрады да, кейіннен іске қосу арқылы тексеріледі екен. Яғни суға төзімділігі анықталып барып, сатылымға шығарылады. Со­­нымен қатар мұнда темір сөрелер де жасалады.

Өндіріс орны алдағы уа­қытта мемлекеттік қолдау арқылы өнім көлемін ұл­ғайтып, экспортқа шығаруды жоспарлап отыр.

 

ШЫМКЕНТ