Тіл – халықтың басты құндылықтарының бірегейі. Оны құрметтеу – қоғамға ортақ міндет. Қазақстанның мемлекеттік тілі – қазақ тілі – заңмен бекітілген құндылық. Еліміздегі барлық этнос өкілдері мемлекеттік тілді сыйлауға міндетті. Қазақ тілінің мәртебесін көтеру мақсатында әр жылдары түрлі жобалар ұйымдастырылып келеді. Мемлекет билігі де бұл мәселеге зор көңіл бөліп отыр. Қазақстанды мекендеген корей этносының өкілдері де мемлекеттік тілімізге аса құрметпен қарайды. Бәрі түгел еркін меңгереді демесек те, көптеген азаматтарымыз қазақ тілінде жетік сөйлейді. Бұл, ең алдымен, өзі өмір сүріп отырған ортаны құрметтеу болса, екінші жағынан Қазақстан азаматы ретіндегі жауапты міндет.
Қазақстан зайырлы мемлекет ретінде әрбір азаматтың құқы мен таңдауына қол сұқпайды. Қанша тіл білсең де шектеу жоқ. Алайда, әрбір адам мемлекет алдындағы жауапкершілікті жіті сезініп, мемлекеттің заңын, тілін, ұлттық ерекшеліктерін құрметтегені абзал. Бұлай болған жағдайда этносаралық татулық пен қоғамдық келісім салтанат құрып, этностар өзара рухани байланыс орнатады, бірін-бірі жақсы түсінеді.
Мемлекеттік тіл мəртебесі əрбір Қазақстан азаматы үшін қымбат болуға тиіс. Қазақ халқы көптеген ұлттарды қиын-қыстау кезеңде бауырына басып, өз төрінен орын бергені тарихтан белгілі. Ұлты, тілі, діні, салт-дəстүрі басқа деп өзекке теппей, бір атаның ұл-қызындай көрді. Тəуелсіздік алғаннан бері бұл жақсы дəстүр өркен жайып, Қазақстанда тыныстап, тіршілік ететін этностардың татулығы мен бейбіт өмір сүруі соның жемісі деп айтуға болады.
Қазақстан халқы Ассамблеясында өзара түсіністік пен рухани дәстүрлер тоғысын арқау еткен ауқымды жобалар көп. Мұның ішінде мемлекеттік тілдің мерейін өсіріп, абыройын асқақтатуға бағытталған шаралар да аз емес. Мәселен, көптеген этнос өзінің жастарына қазақ тілін үйрететін үйірмелер ашу арқылы тіл беделін нығайтуға үлес қосып келеді. Тіл мәртебесін айқындауға арналған түрлі форумдарда этностардың қазақ тілін жетік меңгерген өкілдері сөз алып, өз ойларын жүйелі жеткізіп жүр. Осы қоғамның бір мүшесі ретінде мен барша отандастарымды мемлекеттік тілдің мәртебесін көтеруге, оны құрметтеуге шақырамын. Бұл – ең алдымен өзімізге, елімізге деген құрмет.
Мемлекеттік тілімізді қолдау, ол бір мақсатқа жұмылған халқымыздың бір-біріне деген ықыласын, достығын нығайтады. Ынтымағымыз берік болу үшін мемлекеттік тіл сынды ортақ құндылықтарымызға сый-құрметпен қарағанымыз жөн. Сонда тәуелсіз мемлекетіміздің болашағы да жарқын бола түседі.
Сергей ОГАЙ,
«Қазақстан Корейлер қауымдастығы» заңды тұлғалар бірлестігінің төрағасы
АЛМАТЫ
