«Келе жатқан жылыту маусымында елорданың тағы төрт елді мекенінің тұрғындары газға қосылу мүмкіндігіне ие болады. Оңтүстік-Шығыс, Железнодорожный, Көктал-1, Агроқалашық (2020 жылы газға қосылмаған бөлігі) елді мекендерінде газ тарату желілерінің құрылысы жүргізіліп жатыр. Сонымен қатар алдағы жылыту маусымында «ҚазТрансГаз Аймақ» АҚ Күйгенжар, Мичурино, Интернациональный елді мекендерін газға қосуды жоспарлап отыр», деп жазды әкім.
Оның айтуынша, елорданың елді мекендерінде 345 км орамішілік газ тарату желілері салынған.
«Аудан әкімдеріне елді мекендерде газ тарату желілерінің құрылыс барысын жандандыруды тапсырдым. Жүргізілетін жұмыстардың қауіпсіздігі мен сапасын қамтамасыз ету маңызды. Өткен жылыту маусымында (2020-21) Железнодорожный, Көктал-2, Агроқалашық (бір бөлігі) елді мекендерінің тұрғындары газға қосылу мүмкіндігін алды. Кездесулерде қала тұрғындары сатып алынған көмірді жұмсау қажеттігін атап өтті. Дегенмен тұрғындар жеке секторға газ жүргізіп жатқанына қуанышты.
Газдандыру басталған сәттен бастап әлеуметтік аз қамтылған отбасыларға үйлерді газға көшіру бойынша әлеуметтік көмек көрсету тетігі енгізілді. Біржолғы әлеуметтік көмек жеке үйлердің меншік иелері болып саналатын зейнеткерлерге, мүмкіндігі шектеулі ересектерге/кәмелетке толмағандарға, көпбалалы аналарға және көпбалалы отбасыларға беріледі», делінген жазбада.
Негізгі критерий – оларда және отбасы мүшелерінде басқа тұрғын үйдің болмауы және төрт ең төменгі күнкөріс деңгейінен аспайтын жан басына шаққандағы орташа табыстың болуы (153 872 теңге). Бұл санаттарға газға қосылуға 90 АЕК – 262 530 теңге мөлшерінде ақшалай көмек бөлеміз.
Әлеуметтік көмекті алу үшін өтінімді egov.kz электрондық үкімет порталы арқылы қалдыруға болады («электрондық өтініштер» – «қызметке онлайн тапсырыс беру». Өтінім беруші бағанында тұрғын үйді газдандыруға әлеуметтік көмек, өтінім қабылдаушы бағанында жұмыспен қамту және әлеуметтік қорғау басқармасын таңдау қажет).
«Былтыр газ тарифі төмендетілді. Газдың бір текше метрінің бағасы 45 теңгеден 34,6 теңгеге дейін төмендеді (бұрын бір текше метр үшін 60 теңге бағасын белгілеу болжанған болатын). Әкімдік жеке сектордың тұрғындары үшін тегін негізде есептегіштерді қарастырды. Әкімдік «Halyk bank» АҚ және «ECOJER» қауымдастығымен бірлесіп, қала тұрғындарына үйлерді газға қосу үшін пайызсыз несие беруді ұйымдастырды. Сонымен қатар қаланың экологиясын жақсарту үшін 1-ЖЭО және 2-ЖЭО төрт қазандығы газға ауыстырылды. Осы жылдың соңына дейін тағы 9 қазандықты газға ауыстырамыз.
Қаланы газдандыру 3 кезеңнен тұрады. 2019 жылдың басында мердігерлік ұйымдар арасындағы сот дау-дамайларына байланысты кестеден 9 айға артта қалдық. Бірақ алғашқы үйлерді газға қосқанға дейін кестеге сай жұмыс істейміз. Газдандыру процесі кестеге сәйкес жүргізіліп келеді. Тағы 1 мыңнан астам отбасы үйлерді газға қосуға техникалық шарттар алды», деп жазды елорда әкімі.
