Ақ үйдің ресми сайтында Ресей Федерациясы үкіметінің «зиянды сыртқы әрекетіне» жауап ретінде жарияланған мәлімдемеде бірқатар жеке тұлға мен ұйымның жұмысына шектеу қойылған. Құжатта Байден әкімшілігі Америка Құрама Штаттары Ресеймен тұрақты және болжамды қарым-қатынасты қалайтынын анық көрсеткені айтылған. Сондай-ақ АҚШ билігі екі ел қарым-қатынасын теріс траекторияда жалғастыру керек деп ойламаймыз дейді. «Дегенмен, біз ұлттық мүдделерімізді қорғайтынымызды, Ресей үкіметінің қауіп төндіретін іс-әрекеттеріне жауап беретінімізді ашық айттық» делінген хабарламада. Бұл арқылы АҚШ Ресейдің «тұрақсыздыққа жетелейтін халықаралық іс-қимылдары» тоқтамаған немесе одан сайын өршіген жағдайда стратегиялық және экономикалық салдары болатынын ескертіп отыр.
Ресейге тағылған айып көп. Атап айтқанда, «АҚШ пен серіктестерінің демократиялық институттарына, әділ әрі ашық демократиялық сайлау өткізуге кедергі келтіру, кибершабуылдарға ұйытқы болу немесе қатысу, өзге елдердің үкіметтеріне әсер ету үшін трансұлттық сыбайлас жемқорлыққа жол беру, диссиденттер мен журналистерге қарсы экстерриториялық сипаттағы әрекеттер, АҚШ-тың ұлттық қауіпсіздігі үшін маңызды елдер мен мемлекеттердің қауіпсіздігіне қол сұғу, мемлекеттердің аумақтық тұтастығын құрметтеуді ұстанатын халықаралық заң принциптеріне қарсы келу» секілді айыптаулар бар.
АҚШ Қаржы министрлігінің шетелдік активтерді бақылау басқармасы Ресей банкі, Ұлттық әл-ауқат қоры және Қаржы министрлігі шығарған облигацияларды сатып алуға, оларға қарыз беруге тыйым салды. Бұл тыйым 2021 жылғы 14 маусымда күшіне енбек.
Сондай-ақ АҚШ Қаржы министрлігі Ресейдің алты технологиялық компаниясын «қара тізімге» енгізіп отыр. Мәлімдемеде бұл компаниялар «Ресейдің арнайы қызметтерінің кибер бағдарламасына қолдау көрсетеді, оның ішінде сараптамалық кеңестер беріп, бағдарламалар әзірлеуге және киберкеңістіктегі зиянды әрекеттерді жеңілдетуге көмектеседі» делінген.
«АҚШ-тағы президент сайлауының нәтижелеріне әсер етуге тырысқаны» және «жалған ақпарат таратқаны үшін» 32 заңды және жеке тұлғаға cанкция енгізілген. Ел үкіметі мұндай қызметпен айналысатындарды қудалауды жалғастыратынын айтады. Одан бөлек, Вашингтондағы Ресей дипломатиялық миссиясының 10 қызметкерін елден шығару туралы шешім қабылданған.
Жақында АҚШ-ның Қазақстандағы елшісі Уильям Мозер Ресейге қатысты санкциялардың Қазақстанға әсері болмайтынын жеткізді.
«Ресейдің іс-әрекетін өзгерту үшін осы санкция шараларын қабылдағанымызды айтқым келеді. Мұнда бір нәрсені атап өту керек: олардың біздің сайлауға және мемлекеттік ақпаратқа араласу сияқты әрекеті болды. Бірақ Қазақстанға қатысты бұл санкциялардың міндетті салдарын болдырмау үшін біз Қазақстанда жұмыс істедік және жұмыс істей береміз де. Біз бұл санкциялардың Қазақстанға әсер еткенін қаламаймыз», деді У.Мозер.
Ресей өз кезегінде АҚШ-қа қарсы санкцияларын жариялады. Мәскеу сәйкесінше 10 америкалық дипломатты елден шығарып жібермек. Ресей мен үшінші елдердің азаматтарын АҚШ елшілігіне немесе бас консулдығына жұмысқа тартуды тоқтату бойынша да шаралар қарастырылады. Сондай-ақ америкалық дипломаттардың орналасқан жерлерінен тыс аумақтарға сапарларына тыйым салады. Ресейдің ішкі істеріне араласатын америкалық қорлар мен үкіметтік емес ұйымдардың жұмысын шектеу бойынша шаралар қабылданбақ. Сонымен қатар жақын арада министрлік «қара тізімге» енгізілген сегіз америкалық шенеуніктің аттарын жариялайтынын мәлімдеді. Елдің сыртқы істер министрлігі егер Вашингтон санкциялар саясатын ұстануды жалғастырса, Мәскеу басқа да шараларды қарастыра бастайды дейді. Министрлік Мәскеу Вашингтонмен қарым-қатынастағы шиеленістің одан әрі өсуіне жол бергісі келмейтінін және диалогқа ашық екенін жеткізді. АҚШ та соңғы енгізілген санкцияларға қарамастан, дипломатиялық байланыс орнатуға дайын секілді.
Айта кету керек, Ресей президенті Владимир Путин өзге 40 ел көшбасшысымен қатар, АҚШ бастамасымен өтетін Халықаралық климат саммитіне қатысады. Алайда Путин – Байден келіссөзі өтпейтіні белгілі.
