Былтырғы көрсеткіштен биылғы сәйкес мерзімдегі құс саны 22,6 пайызға азайған. Соның кесірінен жұмыртқа өндіру 69 пайызға дейін төмендеген. Тіпті Қызылжар ауданындағы құс саны 46,8 пайызға дейін кеміпті. Бұл жұмыртқа өндіруге ғана емес, құс етін өндіруге де теріс әсерін тигізіп отыр. Соның ішінде Қызылжар ауданында 19,1 пайызға төмендесе, Петропавл қаласында ет өнімдерін шығару 42,3 пайызға дейін құлдыраған.
Облыс әкімі Құмар Ақсақалов құс тұмауынан былтыр 1 млн-ға жуық құс қырылғанын айтты. Мемлекет 813 млн теңге өтемақы төлеген. Бүгінгі таңда құс фабрикалары 1 млн бас құс әкелген, тағы да 760 мың бас әкелуге келісімшарт жасаған. Бұл құстар мамыр айында жеткізілмек.
Осы арқылы кейбір құс фабрикалары өнім көлемін бұрынғы деңгейге жеткізді. Мәселен, «Якорь» құс фабрикасы қазір 14 млн данаға дейін жұмыртқа шығарады. Бұл бұрынғы көрсеткішке қарайлас. Бірақ осы Қызылжар ауданындағы «Бескөл құс фабрикасы» дағдарыстан әлі де арыла алмай, өнім көлемін діттеген межеге жеткізе алмай отырған көрінеді. Бұрын үнемі алдан көрінетін озық кәсіпорынның бір соққыдан оңалмай қалғаны ма? Былтыр бұл кәсіпорын құс тұмауынан қатты зардап шекті. Фабрика басшысының айтуына қарағанда, 180 мың тауық қырылды. Облыстағы ауылшаруашылық кәсіпорындар арасында үнемі алдыңғы қатарда жүретін бескөлдіктерге бұл оңалмас соққы болды. Оның үстіне, өтемақыны да толық ала алмаған.
Сөйтсек, гәп басқада. Облыс әкімінің бірінші орынбасары Марат Тасмағамбетов бескөлдіктер 25 мың құс сатып алғанын айтты. Сондай-ақ алдағы шілде айына дейін тағы 100 мың тауық жеткізбек екен. Ең бастысы, бұл кәсіпорын енді өзіндегі үйректі тегіс етке сатып, жұмыртқа өндіруге ауысып жатқан көрінеді. Бұл үшін бұрынғы ғимаратын да қайта жарақтап, енді тек тауық өсіруге ыңғайлапты. Қазір кәсіпорын 30 мың үйректі сатуға әзірлеп отыр. Соның есебінен Германиядан тауық сатып алмақ. Кәсіпорын мамандары қазір неміс технологиясын меңгеру қамымен Германияда жүр.
Солтүстік Қазақстан облысы
