«Атаңнан мал қалғанша, тал қалсын» деп түсінген дана халқымыз көрегендіктің көркем үлгісін көрсетсе керек. Оны о бастан түйсінген астаналық қаламгерлер бірден осындай игі іске өз үлесін қосуға ниеттеніп, көтеріңкі көңіл күймен жиналды.
Қаламға серт еткен жандар қатар-қатар саябақтың Абай көшесіне қараған жағында 25 түп ағаш отырғызды. Кәрі-жасына қарамай бәрі де бір-бір күрек ұстап, жас көшеттің жайқалып өсуіне тілектерін білдірді. Жазушылармен бірге Нұр-Сұлтан қаласы әкімінің орынбасары Бақтияр Мәкен мен Байқоңыр ауданының әкімі Нұрбол Нұрсағатов та білек түріп, жұмысқа кірісті.
«Қойшығара Салғараұлы ағамыздың «Бұл сенбілікке алдымен өздеріңді көруге келдім. Пандемия жағдайында көп жүріп-тұра алмағандықтан, осындай ел-жұрт қатысатын жұмысқа келгеніміз бір жағынан қаланың тазалығына, экологиясына қосқан пайдалы үлесіміз болса, екінші жағынан жүздесуімізге де сеп болғаны жақсы ғой», деген сөзінде жан бар деп ойлаймын. Бүгін «Қаламгерлер аллеясында» отырғызған ағаштар ертеңгі болашақтың ағаларға деген құрметін арттыруға сеп болатыны сөзсіз», деді Қазақстан Жазушылар одағы Нұр-Сұлтан қалалық филиалының директоры Дәулеткерей Кәпұлы.
Аталған шараға қазақ әдебиетінің көрнекті өкілдері Сұлтан Оразалин, Қойшығара Салғараұлы, Әлібек Асқаров, Несіпбек Айтұлы, Толымбек Әдірайым, Сәдібек Түгел және басқа да белгілі ақын-жазушылар қатысты. Мүшелікке өткен жас буын да ағаларымен бірлесіп, саябақтың сәнін келтірді.
Байқоңыр ауданының әкімдігі ұйымдастырған ыстық шай мен бауырсақ та қаламгер қауымның көңілін көтеріп, жұмыстан кейін емен-жарқын дидарласуға дәнекер болды.
