Ресейлік үздік кино туындыларға жыл сайын берілетін айтулы жүлдені табыстау рәсімі былтыр пандемияға байланысты өткізілмей қалған еді. Биыл сол олқылықтың орнын толтырып, ресейлік кино мамандар екі жылдың қорытындысын қатар шығарды. Нәтижесінде, 2019 жылдың қорытындысы бойынша режиссер Сергей Дворцевойдың «Айка» фильміндегі жарқын ізденісі үшін Самал Еслямова үздік актриса деп танылып, «Ника» сыйлығымен қанжыға майлады.
– Өте қуаныштымын. Бұл менің ғана емес, фильм түсіріліміне атсалысқан барша шығармашылық ұжымның жеңісі деп білемін. Алайда өзім Мәскеуде өткен марапаттау рәсіміне бара алмадым. Сыйлықты мен үшін фильмнің екінші режиссері, актер Вячеслав Агашкин алды. Слава болмаса, бұл фильм сәл өзгеше болар ма еді?.. Ол жүгіріп жүріп, түсірілім орындарын, әртістерді де өзі тапқан өте еңбекқор адам. Осы сәтті пайдаланып мен тағы бір мәрте «Айка» фильміндегі барлық әріптестеріме рахмет айтқым келеді, – деді актриса Самал Еслямова ағынан жарылып.
Фильм жат елде заңсыз жалдамалы жұмыс істейтін жандардың қиын да қайшылықты өмірін боямасыз суреттейді. Жоспардан тыс жүкті болып, жастық албырттықпен сәбиін перзентханада тастап кетуге мәжбүр болған, кейін қатесін түсініп баласын іздеуге бел буған қырғыз қызының басынан өткен қиындық пен тауқыметке толы психологиялық күйді баяндайтын картина өзінің тақырып ауқымдылығы һәм шынайылығымен жалпы халықтық прокатқа шықпай тұрып-ақ, 2018 жылы Канн кинофестивалінде үздік атанып, кино әлемін дүр сілкінткен болатын. Сыншылардың жоғары бағасына ие болып, талай байқауда үздіктер тұғырынан көрініп жүрген туындының бұл кезекті жүлдесі де сол тынымсыз еңбек пен маңдай тердің жемісі болса керек.
– Актерге туа бітті таланттан бөлек, мінез де қажет. Самалдың бойында қолға алған ісін соңына жеткізбей тынбайтын қайсар да өжет мінез бар. Сырттай өте нәзік көрінгенімен, ішкі қуаты мықты. Самал жарқ-жұрқты басты планға шығарған иллюстратор емес, шын мәніндегі сезімнің актрисасы. Осы тұрғыдан келгенде біз жақсы түсіністік. «Айканың» кезекті жеңісі де сол ізденіс пен тереңдіктің нәтижесі екені сөзсіз, – деді фильм режиссері Сергей Дворцевой.
«Айка» – режиссер Сергей Дворцевойдың 2018 жылы жарық көрген драмалық фильмі. Картина сол жылы 71-ші Канн кинофестивалінің басты байқау бағдарламасына қатысып, онда Самал «Үздік актриса» атанса, іле Котбусте (Германия) өткен 28-ші Халықаралық кинофестивальдің және Токио кинофестивалінің Гран-приін иеленді. Одан бөлек Түркияны да тәнті еткен туынды, кезекті түрік кинофестивалінде сыншылар қауымының ілтипатына бөленіп, «Үздік актриса» аталымындағы жүлдені қазақ қызының қанжығасына байлап берген болатын. Енді міне, Ресей кино мамандарының да жоғары бағасын алып, бірауыздан қолдауына ие болған Самалдың таланты «Ника» сыйлығымен және бір мәрте мойындалып отыр.
Иә, еңбек пен ізденіс бар жерде жеңістің де қатар жүруі заңды. Самалдың таланты мен экрандағы шынайы ойыны һәм кино кеңістігіндегі жемісті жолы соның айғағы. Аз ғана уақыт ішінде төрткүл дүние назарын өзіне бұрғызып, тақырып ауқымдылығымен де, көркемдік сапа деңгейімен де талайды тәнті еткен фильмнің алдағы уақытта да бағындырар белесі мол болсын демекпіз.
