– Әрине, шағын өлеңдер сәтіне қарай жазыла береді ғой. Соңғы жылдары бірталай көлемді дүниелер әкеліппін. «Кіші Қияметтегі Қазақстан» атты әфсана-хикая дастандар шоғыры, «Баба-дастан» деген тарихи дастандар циклі аясындағы шығармалар, драмалық туындылар, тәржімалар, эсселер дүниеге келді. Олардың әлі де жазыла беретін түрі бар. Сондай-ақ, «Мағдауият майданы» атты синкретті сипаттағы екі том еңбек жазылу үстінде. Екінші томының тынғысы қойылуға тақау… Айтпақшы, бұлар некен-нұқан болмаса, әзір тұтастай баспа жүзін көре қойған жоқ. Әзірге – осы.
Ал жазылмай, толғағы жетпей, кілті табылмай жатқан нәрселер шаш-етектен… Бір парасын ғана айтайын. Менің Ұлы би Едіге, Хан Тоқтамыс, Әмір Темір заманы туралы толғанғаныма біраз болды. Кілті қолға түспей жүр. Түссе, қалғаны қиын болмас еді. Әз Тәукенің сардары, қазақ жадында талай ертек-аңыздарға арқау болған Есенғұлұлы Есек-Мерген батыр жайлы тарихи-публицистикалық жанрдағы еңбек жазғым келіп жүр. Материалдары дайын, бірақ ішкі дайындығым піспей жатыр. Одан кейін, көптен ұлы жобасы кеудемде қаланып жатқан «Тас кітапқа» кірісетін шығармын. Қалғанын Құдай ғұмыр берсе, уақыт көрсетер… «Семіздеу сөйлеп» қойсам, мәртебелі оқырманнан алдын-ала ғафу өтінемін. Барым – осы.
– Шығармашылық сырыңызбен бөліскеніңізге рахмет.
