Ел тәуелсіздігінің 30 жылдығын атап өту аясында пайдалануға берілген көп салалы «Сүлеймен» спорт кешені соңғы үлгіде салынған. Түпқараған ауданында спорттық құрал-жабдықтармен толық қамтылған 14 ашық спорт алаңы, 5 футбол алаңы, 5 көше тренажері, 4 жабық спорт кешені бар. Биыл оның қатары тағы үш бірдей спорт кешенімен толығады. Ақшұқырда спорт нысандарының біреуі жергілікті бюджет қаражатына салынады. Сондай-ақ Ақшұқыр ауылындағы жаңалық биыл аталған ауданның Баутин және Қызылөзен ауылдарында жалғасын тауып, бұл ауылдарда да спорт кешендері бой көтермек.
Кеше ғана ауыл тұрғындары мен қонақтарына, жалпы спорт құмар қауымға есігін айқара ашқан заманауи «Сүлеймен» спорт кешенінде 500 адам бокс, гимнастика, суға жүзу сияқты спорттың бірнеше түрімен айналыса алады. Спорт кешені жекпе-жек түрлерін дамытуға күш салып жүрген атымтай азамат Ибрагим Ақдрашевтың демеушілігімен салынды.
Маңғыстау облысы
