Алматы жер сілкінісі, сел, көшкін, қар көшкіні, су басу, өрт сияқты техногендік және табиғи сипаттағы төтенше жағдайларға бейім аймақ. Жеке құрамның 1,5 мыңнан астам адамы, 270 техника бірлігі ТЖ-дың зардаптарын жоюға үнемі дайын. Қаланың құтқарушылары жылына орта есеппен 3 мыңнан астам жерлерге барады.
2000-2021 жылдар аралығында 202 білім беру объектілеріне, оның ішінде 145 мектепке, 51 балабақшаға, 6 мектеп-интернатқа күрделі жөндеу жүргізілді және олар сейсмикалық күшейтілді. 2021 жылы 8 мектепті, 6 балабақшаны, 1 колледжді, 3 денсаулық сақтау нысанын, 2 азаматтық қорғаныс нысанын сейсмикалық күшейту жоспарлануда.
ТЖ кезінде халықты оқыту және қауіпсіз тәртіп мәдениетін, өздерін дұрыс ұстау дағдыларын қалыптастыру мақсатында елімізде баламасы жоқ инновациялық жоба болып табылатын симуляциялы оқу- әдістемелік орталық салынуда.
Сейсмология Институты 2018 жылдан бері «Қазақстанның оңтүстік-шығысындағы сейсмикалық қауіпті аймақтарды кешенді зерттеу және күшті жер сілкінісі туралы алдын-ала ескерту жүйесінің негіздерін жасау» бағдарламасы бойынша жұмыс жүргізуде.
Осы бағдарламаны іске асыру аясында Институт жапондық шешім базасында тестілеу режимінде ерте хабардар ету жүйесінің 9 сейсмикалық станциясын орнатты. 2023 жылға дейін сейсмикалық датчиктермен, автономды қуат көздерімен жабдықталған тағы 28 станция орнату, сондай ақ сейсмология Институты мен ТЖД-де диспетчерлік пункттер ашу жоспарлануда.
Жүйе автоматты режимде жойқын сейсмикалық толқынның қалаға жақындағаны туралы сигнал береді және тұрғындарға ерте ескерту жасалады,оның ішінде Darmen мобильді қосымшасының көмегі арқылы. Жер сілкінісі туралы сигнал 40 секундқа дейінгі аралықта түседі.
