Қанат қаққан бірер жылдың ішінде ауқымды жобаның аймақтардағы аяқ алысы жаман емес. Алматыда көпбалалы және аз қамтылған отбасыларға арналған тоғыз бірдей «Бақытты отбасы» әлеуметтік орталығы бар. Мәселен, алып шаһардың бір ғана Медеу ауданында аталған бағдарламаның көмегімен қаншама мұқтаж жанның бағыт-бағдар алғанын ауыз толтырып айтуға болады. 2019 жылдың ақпанынан бастап жұмыс істеп келе жатқан Медеу аудандық «Бақытты отбасы» әлеуметтік орталығы көпбалалы, аз қамтылған, толық емес және мүмкіндігі шектеулі балалары бар отбасыларға қызмет көрсетіп келеді.
«Біздің орталық әлеуметтік әл-ауқаты төмен отбасылардың балаларын балабақша кезегіне тұрғызу, атаулы әлеуметтік көмекке тіркеу, жеке куәліктерін қалпына келтіру, «Оңай» картасына тіркелуге септесу, «Отбасы» банкіне арналған құжаттарды жинау мәселелері мен заңдық және психологиялық тұрғыдан туындаған сұрақтар бойынша көмек көрсетеді. Тек қана бұл көмектермен шектеліп қалмаймыз. Орталық тегін психолог және заңгер қызметтерінен бөлек, «Бизнес бойынша кеңес», тігін, массаж, ұялы телефон және гаджеттерді жөндеу, бау-бақша және тағы да басқа тегін курстарды үйретеді. Кәсіппен айналысқысы келетін аналардың бизнес идеясын жүзеге асырып, қаржылық қолдау көрсетеміз. Егер аналар заңгер кеңесіне мұқтаж болса, бизнесті қалай және неден бастау керегін білмесе және отбасы тақырыптарында өзге де сауалдар мазаласа біздің орталыққа жүгінуіне болады», – дейді Медеу ауданы «Бақытты отбасы» әлеуметтік орталығының басшысы Толқын Саметова.
Орталық жетекшісі тілге тиек еткендей, атаулы әлеуметтік көмекке тәуелді болмай, көпбалалы аналардың кәсіптік тұрғыдан дамуына арналған тегін курстар мен бизнес бастау үшін грант ұтып алу мүмкіндігі талай жанға үміт сыйлаған. Орталықта тегін білім алып, алғашқы қолдаудың нәтижесінде өз кәсібін өрге дөңгелеткендер аз емес. Солардың бірі – Жанат Серікбаева мен Айгүл Дусенбаева. Тігін ісі бойынша тәлім алып, әрқайсысы 2 млн теңгелік грант еншілеген қос алматылық тізе біріктіріп тігін цехын ашқан. Сүйікті ісінен нәсібін тапқан ісмерлер алдағы уақытта кәсіптерінің ауқымын кеңейтуді көздейді.
«Іс тігуге бала күнімнен әуестендім. Әжелеріміздің қолынан ұршық түспейтін. Мұның бәрі көз алдымызда қатталып қалған біз, бұл істің негізгі қыр-сырын жасымыздан бойымызға сіңірдік десек болады. «Бақытты отбасы» жобасы арқылы қол жеткізген грантымыз өз арманымызды іске асыруға демеу болды. Бүгінгі таңда аталған мамандық үлкен сұранысқа ие. Бізді қолдап, қаржылай көмек көрсеткен жобаға алғысымыз шексіз. Бұл шын мәнінде, еңбеккер аналар үшін таптырмас мүмкіндік», дейді Ж.Серікбаева.
Отбасы құндылықтары тұрмыстық жайттардың тасасында қалмас үшін аналарды рухани қолдау маңызды. Әлем елдерінің ішінде ажырасу көрсеткіші жағынан Қазақстан алдыңғы орындардың бірінде тұрғанын ауыр да болса мойындауға тура келеді. Осыны ескерген орталық мамандары өміріне шағым айтып келген жандардың көңілін аулап, санасын серпілтуге зор мән береді. Кәсіби психологтар, тіпті тіршіліктен баз кешкенін айтып алдарына жүгінген аналарға моральдық демеу беріп, орталық арқылы жан-жақты қолдау көрсеткен. Олардың ішінде орталық көмегімен жеке бизнесін бастап, қаржылық тәуелсіздікке қол жеткізгендер де бар» дейді мамандар. Мұндағы компьютерлік орталықта түрлі курстар жүргізілсе, балаларымен келген аналар үшін арнайы бөлмелер де қарастырылған. Онда курс уақыты біткенше тәрбиешілер балаларды сурет салып, желіммен түрлі пішімдер жасауға баулиды.
2019 жылы Алматы қаласының әкімдігі «Отбасы» банкімен бірлесе отырып, көпбалалы жандар үшін «Бақытты отбасы» бюджеттік несие беру бағдарламасын іске қосқаны мәлім. Бағдарламаның нәтижесінде жүздеген үйелмен жеңілдетілген несиемен үй алып, қоныс тойын тойлаған болатын.
Қысқа мерзім ішінде жүзеге асқан жоба талай жанның жүзіне шуақ сыйлағаны қуантады. Алдағы уақытта мұндай нағыз қажетті бағдарламаның ауқымы кеңейтіліп, шалғай аймақтардағы кәсіби мамандардың кеңесіне зәру болып отырған жандарға да қамқорлық көрсетілсе құба-құп.
АЛМАТЫ
