Қазіргі кезде Сарыбұлақ ауылдық округінде орналасқан «Благовещенка» ЖШС құлпынайдың «Альбион» сұрпын отырғызуды қолға алған. Құлпынайдың бұл ерекше сұрпының жидегі қатты әрі тәтті және хош иісті болып келеді. Жинағаннан кейін де тауарлық түрін жоғалтпай, сауда нарығына шығаруға өте ыңғайлы. Әрі бұл жемістің көпшіліктің сұранысына ие екендігі де даусыз.
Аталған серіктестіктің басшысы Өмірәлі Варшакидзе былтыр құлпынай көшеттерін 10 гектар алқапқа отырғызып, одан 5-6 тонна өнім алыпты. Биыл кәсіпкер тағы да 300 мың түп көшет сатып алып, егіс көлемін бірнеше гектар алқапқа дейін арттырған. Құлпынай өсірумен айналысатын шаруашылыққа бұл мақсатқа бүгінде мемлекет тарапынан қолдау көрсетіліп, 50 пайыз субсидия берілуде. «Мемлекет қолдауының нәтижесінде құлпынайдан мол өнім алуға барлық жағдай жасалған. Құлпынай өсіру табысы мол жұмыс. Ол жыл сайын өнім береді. Ең бастысы, барлық технологияны мұқият сақтаған жөн», дейді Өмірәлі Варшакидзе.
