Биыл 2 611 ауыл кәсіпкеріне 70 млрд теңге көлемінде бюджеттік қарыз берілді. «Кең дала» кредит беру бағдарламасы бойынша жылдық 5 пайызға дейін жеңілдетілген мөлшерлемемен 3,3 млн гектар алқаптағы жұмыстар қаржыландырылды. Өтінімдердің басым бөлігі әдеттегідей Солтүстік Қазақстан, Қостанай, Ақмола, Түркістан облыстарынан келіп түскен. Мәселен, Түркістан облысының өзінде биыл 1 438 ауыл шаруашылығы тауарын өндіруші жалпы сомасы 5,7 млрд теңге болатын жеңілдетілген қарызды алды.
Корпорация 2016 жылдан бастап көктемгі егіс және егін жинау жұмыстарының ірі қаржылық операторы болып саналады. Бұл мақсаттарды іске асыруға республикалық бюджеттен жыл сайын жеңілдетілген қарыз түрінде қаражат бөлінеді. Былтырдан бері Мемлекет басшысы Қасым-Жомарт Тоқаевтың тапсырмасы бойынша көктемгі егіс және егін жинау жұмыстарын өткізу сомасы 70 млрд теңгеге дейін ұлғайтылды.
«Кең дала» бағдарламасының нәтижесінде фермерлер егін егу науқанын уақытында бастауға мүмкіндік алды. Пестицидтер мен тыңайтқыштарды, сапалы тұқымдар мен жанар-жағармайды, ауыл шаруашылығы техникасын жөндеуге арналған қосалқы бөлшектерді сатып алуға айналым қаражатын толықтырды. Қарыз жылдық 1,5 пайыздан бастап, соңғы қарыз алушы үшін жылдық 5 пайыздан аспайтын жеңілдетілген пайыздық мөлшерлеме бойынша беріледі.
Көктемгі дала жұмыстарының маусымы өте қысқа уақытты қамтиды. Шектеулі мерзім ішінде кредит беру кезінде шаруашылықтар мен агроқұрылымдардан түскен өтінімдердің үлкен ағыны қалыптасады. Мысалы, биыл 2 611 өтінім берілген. Бұл өткен жылғы көрсеткіштен 7 пайызға артық.
Кредит беру мерзімдерін барынша жеделдету және қолжетімділігін арттыру, сондай-ақ ауыл шаруашылығы тауарын өндірушілердің көп бөлігін қамту мақсатында Аграрлық несие корпорациясы қорландыру арқылы басқа қаржы институттарының мүмкіндіктерін пайдаланады. Бұл қатарда 30 мыңнан астам ауыл шаруашылығы тауарын өндірушіні біріктіріп отырған екінші деңгейлі банктер, микроқаржы ұйымдары және 217 кредиттік серіктестік бар.
Биыл 70 млрд теңгенің 63 млрд теңгесі қаржы институттарын қорландыру арқылы бөлінді.
