Бұл игі бастамаға Елбасы Нұрсұлтан Назарбаев қолдау білдіріп, Тараз қаласында өткен алғашқы түлектер форумына қатысушыларға құттықтау жолдаған болатын. Оны Тұңғыш Президент – Елбасы Кеңсесінің басшысы Махмұт Қасымбеков жеткізіп, жерлестеріне жүрекжарды лебізін арнаған болатын.
Облыс әкімі Бердібек Сапарбаевтың бастамасымен қолға алынған аталған жоба қазіргі кезде аймақтың барлық ауданында іске асырылу үстінде.
Шу ауданында өткен «Жомарт түлек» форумында да Махмұт Қасымбеков туған өңірінің өркендеуіне тілектестігін білдірген еді. Өзі білім алған Шу қаласындағы С.Сейфуллин атындағы мектеппен ұзақ жылдардан бері тығыз байланыс орнатып келе жатқан Махмұт Базарқұлұлы ауданға өзінің және Нұрсұлтан Назарбаев Қоры мен Nur Otan партиясының атынан кәдесый ретінде сәлемдемелер жолданатынын хабарлаған болатын. Сонымен қатар С.Сейфуллин атындағы мектепті 1969 жылы бітірген түлектердің атынан жағдайы төмен отбасынан шыққанымен, оқу үлгерімі жоғары екі оқушыға Л.Н.Гумилев атындағы Еуразия ұлттық университетінде өздері қалаған кез келген мамандықта білім алуға мүмкіндік беретін грант тағайындайтындығын жеткізді.
Жуырда Тұңғыш Президент – Елбасы Кеңсесінің қызметкері Санжар Әлиев Шу ауданына арнайы келіп, Д.Қонаев ауылдық округінде орналасқан Төле би атындағы орта мектепте өткен жиынға қатысты. Ол өз сөзінде «Жомарт түлек» форумының өте жақсы ойластырылған идея және игі іс-шара екенін атап өтіп, аудандағы еріктілер мен белсенді жастарды ынталандыру үшін оларға арнайы тігілген күртешелер мен кеудешелер тапсырды. Оған қоса, аудандық кітапханаға көркем әдебиет жанрындағы және қоғамдық-саяси мазмұндағы 500-ден астам түрлі кітап сыйлады.
Жиында Шу ауданының әкімі Нұржан Календеров «Жомарт түлек» жобасына алғашқылардың бірі болып қосқан қомақты үлесі үшін Махмұт Қасымбековке алғысын білдіріп, ауыл жастарына кітап сыйлау олардың рухани байлығын арттыруға сеп болатынын және мұның өскелең ұрпаққа да өнеге болатынын айтты.
