Цифрлық экономиканы дамыту орталығының техникалық директоры Гүлжан Қонқашеваның айтуынша, байланыс орталығында бірнеше ауысымда
20 оператор жұмыс істеп жатыр. Олар үш қолдау желісіне сәйкес өтініштерді тіркеп, жауап береді. Кәсіпкерлер «жедел желіге» қоңырау шалып, жалпы мәселелер төңірегінде тауарларды таңбалау және қадағалау бойынша кеңес ала алады. Сондай-ақ қажет болған жағдайда жекелеген тауар топтарын таңбалау мәселелері бойынша маманданған сарапшылар егжей-тегжейлі түсініктеме береді. Жүйеде тіркелуге, құжаттарды ресімдеуге, қалыптастыруға, жөнелтуге байланысты мәселелер туындаған жағдайда өтініш техникалық қолдау желісіне жіберіледі.
Цифрлы таңбалауға қатысты «жедел желі» өз жұмысын 2020 жылдың тамыз айында бастаған болатын. Яғни темекі өнімдерін міндетті цифрлы таңбалауға екі ай қалғанда іске кірісті. Байланыс орталығына ең көп өтініш былтыр қыркүйектен желтоқсанға дейінгі аралықта келіп түскен. Бұл бизнестің темекі нарығындағы жаңа жұмыс жағдайына бейімделу кезеңі болды. Осыған байланысты көптеген сұрақ та туындады. Цифрлы таңбалау бойынша байланыс орталығы 9 ай ішінде 10 мыңнан астам өтінішті өңдеп үлгерген. «Жедел желі» тәулік бойы, аптасына жеті күн жұмыс істейді. Жұмыстың нағыз қызған шағында тәулігіне 300-ге дейін өтініштерді өңдеуге тура келеді.
– 1 шілдеден бастап аяқ киім тауарларын міндетті таңбалау енгізіледі. Сондықтан маусым-шілде айларында аяқ киім нарығындағы ойыншылар тарапынан келіп түсетін өтініштер саны өсуі мүмкін. Кеңесшілер бизнеске барынша жедел түсініктеме, кеңес беруге дайын. Орташа алғанда кеңес беру сипатындағы сұрақтарға клиент жүгінген сәтте 5-10 минут ішінде жауап алады. Егер мәселені егжей-тегжейлі зерделеу қажет болса, ең ұзақ дегенде жауап беру уақыты 24 сағаттан аспайды. Қалай болғанда да, жүгінген әрбір адам қойылған сұраққа толыққанды жауап алады. Бұл байланыс орталығы жұмысының басты ережесі, – дейді Г.Қонқашева.
Байланыс орталығы өтінімдерді телефон арқылы, сондай-ақ электронды мекенжай және Тауарларды таңбалаудың және қадағалаудың ақпараттық жүйесінің веб-интерфейсі арқылы қабылдайды. Операторлар тауарларды цифрлы таңбалау және қадағалау мәселелері бойынша үнемі білім жетілдіріп тұрады. Қазіргі уақытта байланыс орталығын кеңейту және қызмет көрсетудің омниканалды моделін дамыту қарастырылуда. Бұл 2022 жылы елімізде тауарлардың өзге топтарына міндетті цифрлы таңбалау енгізілетін кезде өзекті болмақ.
Еске сала кетейік, Қазақстанда өткен жылдың қазан айында темекі өнімдерін міндетті таңбалау енгізілді. Қазіргі уақытта фармацевтикалық препараттарды, алкоголь және сүт өнімдерін цифрлы таңбалау бойынша қанатқақты жобалар жүзеге асырылуда. Таңбалаудың басты мақсаты – тұтынушыларды контрафактілік және жалған өнімдерден қорғау. Сонымен қатар цифрлы таңбалау бизнестің өнімділігін арттыруға, логистикалық схемаларды жетілдіруге және нарық үлесін арттыруға мүмкіндік береді.
