Биыл желаяқ офицер Жезқазған – Жаңаарқа бағыты бойынша 320 шақырымды 44 сағат
59 минут және 13 секундта жүгіріп өтті. Ультрамарафонды ол 27 мамырда Жезқазған қаласынан бастап, арада екі күн өткенде өзінің туған жері Жаңаарқа ауданында жоспарланған уақыттан үш сағат бұрын аяқтады. Айта кететін бір жайт, жүгіру навигациялық платформаның көмегімен қадағаланды.
Заңғар Әлкеновтің бұл жетістігі Қазақстанның «Рекордтар кітабына» енгізілетін болады. Бұл турасында аталған ұйымның өкілі Бақытжан Тастүлеков мәлімдеді. «Ультрамарафоншының рекорды кітапқа 2021 жылдың қараша айында енгізілетін болады», деп атап өтті ол.
Төзімділік пен табандылықтың ерен үлгісін танытқан қайсар азаматқа жерлестері лайықты сый-құрмет көрсетті. Тіпті, демеушілердің оған Hyundai Accent автокөлігін тарту еткенін де айта кеткен ләзім.
– Бәрінен бұрын жерлестерімнің қарсы алғаны, олардың менің жетістігіме қуанғаны қатты әсер етті. Мен үшін әр марафон – мықтылығымды тексерудің төте жолы. Әрине, бұл жолғы жүгіру маған оңайға түскен жоқ. Әсіресе соңғы күні қатты ыстық болып, жүгіруді қиындатып жіберді. Дегенмен, мақсатыма жетіп, қашықтықты мерзімінен бұрын аяқтағаныма қуаныштымын, – дейді З.Әлкенов.
Ультрамарафоншының алдағы жоспары да ауқымды. Денсаулық пен дайындық ойдағыдай болса, ол келесі жылы Қарағанды мен Алматы арасын жүгіріп өтпекші.
Заңғар Әлкенов кезінде боз кілемнің шаңын қаққан балуан болды. Ол қазақ күресінен спорт шебері, дзюдодан спорт шеберлігінен үміткер. Осыдан тоғыз жыл бұрын жарақат алуына байланысты кілеммен қоштасты да, күресті ультрамарафонға, яғни ұзақ қашықтыққа жүгіруге айырбастаған.
