Осы уақыт аралығында ауыз толтырып айтуға болатын ауқымды жұмыстар атқарылып, маңызды шешімдер қабылданды. Ең бастысы, елдің еңсесі биіктеп, абыройы арта түсті.
Отандастарымыз жақсы білетіндей, осыдан екі жыл бұрын Тұңғыш Президент – Елбасы Нұрсұлтан Назарбаев тарихи шешім қабылдап, ел Президенті лауазымын Қасым-Жомарт Тоқаевқа ұсынған болатын. Бұл «жеті рет өлшеп, бір рет кесілген», жан-жақты таразыланған шешім болғаны анық. Себебі ел тізгінін ұстау, Мемлекет басшысы болу деген оңай дүние емес. Оған қоса, дұрыс шешім қабылдап, «өгізді өлтірмеудің, арбаны сындырмаудың» жауапкершілік жүгі тағы бар.
Қасым-Жомарт Тоқаев өзіне жүктелген маңызды міндетті абыроймен арқалап келеді. Сын сағаттарда сыналып, шыңдалды.
Әрине, көп адам «екі жылда елімізде не өзгерді, қандай маңызды шешімдер қабылданды?» деген сұрақ қоюы мүмкін. Елімізде осы аралықта оң өзгерістер өте көп болды. Мәселен, Мемлекет басшысы Қасым-Жомарт Тоқаевтың Жарлығымен Президент жанындағы Ұлттық қоғамдық сенім кеңесі құрылды. Өткен екі жылдың биігінен қарайтын болса, аталған Кеңес «Халық үніне құлақ асатын мемлекет» тұжырымдамасын іске асыруға зор үлес қоса алғанын байқауға болады.
Бұл Кеңес халықты толғандырған, қоғамды мазалаған көптеген мәселе мен сұрақтың жауабын іздеп, олардың оң шешім табуына бастамашы болды. Ел тағдырына бейжай қарай алмайтын отандастарымыз, белсенді азаматтар, тәуелсіз сарапшылар осы Кеңестің төңірегіне топтасып, тізге қосып, бас біріктірді. Екі жылға жуық мерзімде Ұлттық қоғамдық сенім кеңесінің мүшелері жүйелі жұмыстың нәтижесін көрсете алды. Түрлі ұсыныс айтылып, байыпты бастамалар көтерді. Оның өзі қоғамдағы келісімнің жемісті жетістігі, өзіндік нәтижесіне айналды. Соның тұма бастауында Қасым-Жомарт Тоқаев тұр.
Өздеріңіз жақсы білетіндей, экономика бір ғана Қазақстанда, болмаса бір ғана Орталық Азияда емес, бүкіл әлемде құбылмалы болып тұр. Осынау сын сағатта Мемлекет басшысының Қазақстан халқына жасаған жанашырлығы мен танытқан қамқорлығы – несие амнистиясы дер едім. Мұндай амнистияны Президент екі жыл ішінде бір емес, бірнеше мәрте жасады. Соның нәтижесінде қаншама отандасымыз қолдау көріп, иықтағы жүктемесін жеңілдете алды. Бұл да – Президентке тән патриотизмнің, азаматтықтың белгісі.
Әлемді әбігерге салған пандемия жағдайында өмір сүріп жатқанымызға да биыл бір жылдан асып барады. Осы кезеңнің өзінде Қасым-Жомарт Тоқаев өзін іскер тұлға, көшбасшы ретінде көрсете алды. Дүние дүрлігіп жатқанда Президентіміз отандастарымыздың тығырыққа тірелуіне жол берген жоқ. Халықты, кәсіпкерлікті қолдауға арналған игі істер, тың бастамалар қолға алынды. Қарапайым азаматтар, бизнесмендер еңсесі басылып, қолдаусыз қалған жоқ. Осының барлығы Мемлекет басшысы атқарған ауқымды жұмыстардың нақты нәтижесі деп білемін. Мұндай ауыр міндет пен жауапкершілік жүгін екінің бірі арқалай да, атқара да алмайды.
Пандемия адамзат баласының алқымынан алғалы бері дүние жүзінде оннан астам ғана вакцина тіркелгенін білеміз. Сол саусақпен санарлық вакциналардың арасынан отандық QazCovid-in ойып тұрып орын алды. Бұл ненің белгісі? Мемлекет басшысы еліміздегі ілім-ғылымның, медицина саласының дамуына сенімді серпіліс ала келді. Ел ішінде «үйдің отағасы қандай болса, отбасының жағдайы да соған сай болады» деген сөз бар.
Президентіміз жер-жаһанды жайлаған індетке, қиын-қыстау кезеңге қарамастан, еліміздегі ғылымның ілгерілеуіне көп көңіл бөліп отыр. QazCovid-in вакцинасын құлшыныстың нақты нәтижесі деуге болады.
Мемлекет басшысының елді елең еткізген тағы бір бастамасы – зейнетақы қорындағы қаражатты тиімді пайдалануға беру мәселесін жолға қойғаны. Бұл – көптеген мемлекет басшыларының қолынан келмейтін, мұндай қадамға баруға батылы жетпейтін бастама. Сол қадамды Қасым-Жомарт Тоқаев жасады. Соның нәтижесінде көптеген отандасымыз баспаналы болып, баспана алмағандары қаражаттарын денсаулығын жақсартуға жұмсады. Осы игі бастама әлі де жалғасын тауып жатыр.
Әрине, ел Президентінің елге сіңірген еңбегін шағын мақалаға сыйдыру мүмкін емес. Біздің айтып отырғанымыз – екі жылда атқарылған еңселі істердің бір парасы ғана. Алда ауқымды жұмыстар, маңызды бастамалар, бағындырар белестер көп. Ең бастысы, Мемлекет басшысының әр қадамы халықтың жағдайын жақсартуға, тұрмысын түзеуге, әл-ауқатын арттыруға бағытталып келеді. Келер жылдары да солай бола беретініне сенімдімін.
Геннадий ШИПОВСКИХ,
Мәжіліс депутаты