Осы бір тарих өлшеміндегі қас қағым уақытта қазақ ұлты ғаламат жетістікке жетіп, шекарасы шегенделген егеменді елге айналды, өз тағдырын өзі айқындайтын дәрежеге жетті, халықаралық қауымдастықта өз орнын тауып, беделі, ықпалы артты.
Соның нәтижесінде еліміздің тәуелсіз мемлекет ретінде негізі, тұғыры, іргетасы берік қаланды. Бұл – әрине, осы кезеңдегі Мемлекет басшысы, Тұңғыш Президент Нұрсұлтан Назарбаевтың сыртқы саясаттағы қажырлы, табанды еңбегінің жемісі.
Сонымен қатар қазіргі кезеңде әлемдегі халықаралық жағдай ерекше күрделеніп кетті. Халықаралық құқық бұзылып, алпауыт елдерге тежеу мен тоқтам болмай қалды. Олар басқа елдердің ішкі жағдайына, ісіне тікелей араласатын болды, өз мүддесі үшін соғыс ашуға дайын екендіктерін көрсетіп отыр. Біріккен Ұлттар Ұйымы осындай қысымнан, агрессиядан қорғаныс әлеуеті төмен елдерді сақтауға, оны болдырмауға әзірге қауқарсыз. Сонымен бірге әлемдегі қалыптасқан жаһандану үрдісі бәсеңдеп, көптеген ықпалды мемлекетте ұлтшылдық көзқарас бой көтере бастады, әлемдік саудада әр мемлекет өз мүддесін қорғауға көшті. Дүниежүзілік сауда ұйымының беделі, үйлестіруші рөлі төмендеп кетті, ортақ келісілген принциптер мен тәртіп бұзыла бастады. Санкциялық текетірес үрдіс алды.
Ең күрделісі – әлемде қауіпсіздік деңгейі күрт төмендеді, терроризм мен экстремизм өршіп тұр, жаппай қарулану, әсіресе ядролық қаруды жетілдіру бәсеңдер емес, алпауыт елдер тіпті ғарышты да, ғаламторды да осы мақсатқа пайдалануды қолға ала бастады. Вирустық аурудың неше түрі пайда болып, жалпы адамзат баласына қауіп туғызуда.
Міне, осы жағдайлар Президент Қасым-Жомарт Тоқаевтың алғашқы екі жылғы қызметімен тұспа-тұс келіп, Мемлекет басшысы ретінде оған орасан зор жауапкершілік пен міндеттер артты, жаңа батыл қадамдар мен нақты шешімдерді талап етті.
Осы ретте соңғы екі жылда атқарылған іске зер салсақ, Елбасының назары мен Қазақстан халқының сенімі, қалауы Мемлекет басшысы ретінде жан-жақты дайындықтан өткен, елде де, әлемде де беделі үлкен тұлғаға – Қасым-Жомарт Кемелұлына түскені дер кезінде қабылданған тарихи шешім болғанын уақыт көрсетіп отыр. Саяси сабақтастықты басшылыққа алған Президент заман талабына сай барлық сала бойынша көптеген жаңа бастама мен реформа ұсынды, тиісті заңдар, арнайы шешімдер қабылданды. Нақтырақ айтқанда, қоғамдағы жағдайға шынайы диагноз қойып, оның шешу жолдарын айқын көрсетіп берді. Шындығына келсек, осы екі жылда билік те, қоғам да өзгерді, халықтың үніне құлақ асатын билік қалыптасып келеді, оның жұмысында жариялылық пайда болды, әлеуметтік желіні кеңінен пайдалануға көшті, арыз-шағым жауапсыз қалмайтын болды, цифрлық қоғамға бет алдық.
Ең маңыздысы елдегі ішкі тұрақтылық, бейбіт өмір, этнос пен дінаралық түсіністік, сыйластық сақталып қалды. Әрине, экономикада, әлеуметтік салада әлі де шешілмеген мәселелер жеткілікті, біздің елдің бірлігі мен ынтымағы сақталған жағдайда олардың шешімі табылатыны анық, оған Президент Қасым-Жомарт Тоқаевтың қолға алған реформалары кепіл бола алады, тек қолдай білейік.
Икрам АДЫРБЕКОВ,
мемлекет және қоғам қайраткері,
Төтенше және өкілетті елші
