Нұр-Сұлтан, Павлодар және Тараз қалаларындағы мектептер мен лицейлердің 8 оқушысы білім бәйгесінде еліміздің намысын қорғады.
Білім және ғылым министрі Асхат Аймағамбетов өзінің Facebook парақшасында озат оқушыларды жеңісімен құттықтады. Министр жүлдегерлерге жаңа биіктерді бағындыру жолында сәттілік тіледі.
– Жақында оқушылар арасындағы республикалық олимпиада өз мәресіне жетті. Оған еліміздің 1 500-ден аса дарынды оқушысы қатысты. Бұл – мұғалімдердің, балалар мен ата-аналардың орасан зор еңбегінің нәтижесі. Біз балаларымыздың жеңістері мен жетістіктерге жетудегі ата-аналардың рөлін сирек атап өтеміз. Алайда іс жүзінде ата-ана қолдауымен оқушы айтарлықтай жетістіктерге жетіп жатады. Сондықтан біз республикалық олимпиадаға қатысқан 1 500 оқушының ата-аналарына алғыс хат жолдадық. Айтпақшы, оқушыларымыз халықаралық деңгейдегі жетістіктерімен де қуантып жатыр. Қазақстандық оқушылар Азия олимпиадасында бір алтын және үш қола медаль жеңіп алды. Қатысушыларды жеңістерімен құттықтаймын! Жеткіншектеріміз болашақта биік белестерді бағындырады деген сенім бар. Осы ретте тәлімгер ұстаздарға шәкірттерінің көрсеткен жақсы нәтижелері мен қосқан үлестері үшін алғыс айтамын, – деді А.Аймағамбетов.
Жарысқа қатысқан оқушыларды тәжірибелі педагогтер дайындады. Солардың бірі Сүлеймен Демирел университетінің PhD докторы, профессор Самат Мақсұтұлы бұл олимпиаданың басқа жарыстардан ерекше өткенін жеткізді.
– Жалпы жарыс онлайн форматта өтті. Алдыңғы жылы Тайванда офлайн форматта өтуі керек еді. Бірақ карантинге байланысты өзгертіліп, шегерілді. Оқушыларды жетістіктеріне қарап, бұрын жарыстарға қатысып, жүлделі орындарды иеленген үздіктерін таңдап алдық. Бұл Азиялық олимпиада болғандықтан, кіл мықтылар қатысады. Қытай, Сингапур, Тайван мемлекетінен көптеген оқушы бақ сынады. Біздің де жарысқа қатысқан барлық оқушыларымыз мықты болды. Олар команда құрамында емес, әрқайсысы жеке-жеке өз есептерін шығарып, қатысты. Нәтижесінде қатысушылардың біреуі алтын медальға, үшеуі қола жүлдеге және екеуі марапатқа ие болды, – деді С.Мақсұтұлы.
Жаттықтырушы-мұғалімнің айтуынша, бұл халықаралық деңгейдегі дода болғандықтан ағылшын тілінде өтті. Бірақ тілден қиындықтар болмаған. Себебі тапсырмалардың бәрі – есеп. Арасында сөйлем арқылы берілген шартты есептер болғанда, оқушыларға мұғалімдер көмектескен.
– Жыл сайын өтетін физика-математика олимпиадалары бар. Ал соның ең тартыстысы – Азиялық олимпиада. Енді Азия елдері ғана емес, өзге де құрлықтағы мықты мемлекеттер қатысатын жарысты күтіп, дайындалып жатырмыз. Оған осы олимпиадаға қатысқан 8 баланың ішінен 5 оқушыны таңдап аламыз, – деді педагог С.Мақсұтұлы.
Нұрбибі ҚАДЫР,
Л.Гумилев атындағы Еуразия ұлттық университетінің студенті
