Баспа ісі бәсекені талап етеді

Биыл XVIII мәрте өткізілген «Искус­ство книги» байқауына Қазақстан Рес­пуб­ликасы төрағалық етті. Ұйымдастыру және қатысушы мемлекеттер ұсынған кітаптарды жинақтау жұмыстарын Ұлт­тық мемлекеттік кітап палатасы атқарды. Халықаралық жобаның қорытынды жиналысы жуырда онлайн форматта өтті.

Қорытынды жиналыстың алғашқы күніндегі отырысқа байқау төрағасы, Мәдениет және спорт вице-министрі Нұрғиса Дәуешов қатысып, ұсынылған кітаптардың сапасы да айтарлықтай өс­кенін атап өтті. «Бұл байқаудың бас­ты мақсаты – ТМД мемлекеттері ара­сындағы баспа ісі саласы бойынша әрі жалпы руханият бойынша өзара ын­тымақтастық қарым-қатынасты те­реңдету, дамыту және жаңа жобаларды бірігіп жүзеге асыру, қолдау көрсету, тәжірибе алмасу», деді ол.

Бірінші күннің жоспары бойынша алты мемлекеттен ұсынылған кітап­тарды таныстыру және талдау жұ­мыс­­тары жүргізіліп, пікірталас үш са­ғатқа созылған. Қазылар алқасы ұсы­­ныл­ған кітаптардың халықаралық ын­ты­мақ-                                                                              тастық, Тәуелсіздіктің 30 жыл­дығы, кітап­тың безендірілуі сияқ­ты бағыт­тар­дағы басымдықтарын, ерек­шеліктерін, ізденіс нәтижелерін баға­лады. Негізгі басымдық ұсынылған ең­бектерді но­ми­нация талаптарына сай екенін анық­тауға, жаңа тақырыптардың ұсы­нылуына бағытталды. Байқау шартына сәйкес ұсынылған кітаптар 10 номинация бойынша («Содружество», «Моя страна», «Диалог культур», «Книга для детей и юношества», «Наука и образование», «Арт-кни­га», «Искусство иллюстрации», «Отпечатано в содружестве», «По­беда», «Гран-при») сынға түседі.

Айта кетейік, қорытынды отырысқа Армения Республикасынан Ұлттық кітапхананың Халықаралық жобалар координаторы Маргарэт Асланян, Беларусь Республикасынан Ақпарат министрлігінің Баспа ісі және полиграфия ісі басқармасының басшысы Владимир Андриев, Қазақстан Респуб­ликасынан Ұлттық мемлекеттік кітап палатасының директоры Әділ Қой­танов және «Балалар әдебиеті» бас­па­сының директоры Шайзада Бай­ке­нова, Қырғыз Республикасынан Мем­лекеттік кітап палатасының директоры Койчымбек Мо­мункулов, Ресей Феде­рациясынан Цифрлық даму, байланыс және бұқаралық ақпарат құралдары ми­нистрлігінің БАҚ-тағы мемлекеттік саясат басқармасының басшысы Александр Воропаев қатысты.

 «Искусство книги» байқауына Қазақстан Республикасының төрағалық етуі – Тәуелсіздіктің 30 жылдығы қар­саңында жауапкершілігі жоғары жұмыс болды. Ауқымды іс-шараның жоғары деңгейде ұйымдастырылғанын айтқан Ресей Федерациясынан Цифрлық даму, байланыс және бұқаралық ақпарат құралдары министрлігінің БАҚ-тағы мемлекеттік саясат басқармасының бас­шысы Александр Воропаев елдер ара­сындағы мәдени байланыстарға тоқталды.

«Біз «Искусство книги» байқауын жыл сайын дәстүрлі түрде өткізу ар­қылы ТМД мемлекеттері арасындағы рухани байланысты, мәдени қарым-қатынастарды нығайтып келеміз. Осы бағыттан алып қарасақ, бұл байқаудың тәжірибе алмасу алаңына айналып, халықаралық ауқымда маңызды рөл атқарып отырғанын байқаймыз. Қазақ­стан Республикасы биылғы бай­қауды қашықтан ұйымдастыра отырып, өте жоғары деңгейде алып шыққанын айта кетуіміз керек. Байланыс сапасы да, байқауды ұйымдастыру және оған жергілікті мамандарды шақыру, төр­ағаның әрдайым тікелей байланыста болуы – іс-шараның маңызын арттыратын қадамдар», деді ол.

Ал Қырғыз Республикасының Мем­лекеттік кітап палатасының директоры Койчымбек Момункулов: «Қазақстан Республикасының баспа ісі саласы жыл санап қарқынды дамып келе жатқанын осы байқау төңірегінде көріп отырмыз. Елдің тарихын, мәдениетін, әдебиетін, салт-дәстүрін насихаттайтын ірі шығар­малар басылып жатыр. Біз де биыл осы халықаралық конкурсқа қазақтың заңғар жазушысы Мұхтар Әуезовтің «Абай жолы» роман-эпопеясының қырғыз тіліндегі нұсқасын ұсынып отырмыз. Әдебиет пен өнерде шекара жоқ, біз бауырлас халықтардың мәдениетіне, діні мен тіліне, салт-дәстүріне әрдайым құрметпен қараймыз», деп атап өтті.

Ұлттық мемлекеттік кітап палата­сының директоры Әділ Қойтанов жиналысты қорытындылай келе, екі күн бойы онлайн байланысқа шыққан әрбір қатысушыға алғыс білдірді. «Би­ыл екінші мәрте әлемдегі эпидахуал салдарынан халықаралық байқауды онлайн форматта өткізіп отырмыз. Де­ген­мен қысылтаяң уақыт болса да, біз халықаралық қарым-қатынастарды ны­ғайтуды, баспа ісі саласындағы тәжі­рибе алмасу мәселелерін өзіне жүктей­тін «Искусство книги» байқауы өз дең­гейінде өтті деген ойдамыз», деді ол.

Байқаудың қазылар алқасы Мәскеу халықаралық кітап көрмесі аясында байқау жеңімпаздарын салтанатты түр­де марапаттау шарасын (онлайн өтуі мүмкін) талқылап, егер дәстүрлі фор­мат­та өткен жағдайда басқосуға уағ­даласты.