Медицина • 25 Маусым, 2021

Халық неге тегін вакцинаны салдырмай жүр?

Өткен жылы жазда індет ушығып ауруханаларда орын болмай, халық тентіреп дәрі іздеп сабылған уақытта, аурудан аман алып қалатын вакцинаға зар болды емес пе?! Ал енді бүгін Құдайдың тегін вакцинасынына мұрындарын көтереді.

Egemen Qazaqstan

Мұны қалай түсінуге болады?

Ойпыр-ау!

Кеше ғана бірнеше мыңға имбирь іздеп, хренды жеп, сарымсақ шайнап, тыныстарың тарылып, ыстықтарың көтеріліп, көк жөтел болған уақытта, ауыздарыңа кәлиманы алып жаратқанға жалбарынған халықтың әлем мойындаған вакцинадан қашқақтағанына жол болсын!

Өткен жылы ауру белең алған уақытта, әлем елдері ауруға қарсы вакцина шығарса салдырар мына халық деп ойлаушы едім.

Ал бүгін қалай?

Үкіметтің тегін вакцинасы, тіпті қаласаң бірнеше түрі бар, Ресей, Қытай тіпті міне әлемнің бес елінің ішінде Отандық вакцинамыз да бар.

Біз әлі карантин деп жүрміз. Ауруханаларда әлі де вирус жұқтырғандар азаяр емес, өлім-жітім де бар. Әлемнің дамыған елдері вакцинасын салдырып қалыпты өмірге оралып жатыр, бізге сол күн қашан туар екен?

Сіздерді қайдам? Өз басым, ауырған кезімде вакцина өңім түгіл түсіме де кірген емес. Шүкір аман қалдық, вакцина келген уақытта оны да салдырдық.

Вакцина салдырар алдында бойымда «антитела» бар екен. Бірақ, антитела кез келген уақытта кеміп кетуі әбден мүмкін.

Бәріміз де карантиннен шаршадық, баяғы қалыпты өмірге қайта оралғанға не жетсін? Ал оған не кедергі?

Егер ел болып бірден вакцина салдырғанда, шектеулер жеңілдетіліп, артынша бір жола жойылар да еді. «Жұмыла көтерген жүк жеңіл» дейді, бұйырса ол күн де алыс емес деп үміттенемін.

«Қамсыз қазақ қартайытқан Ұлы Абайды!»

Нұр-Мұхаммед Мәделіұлы

Күннің маңызды және өзекті жаңалықтарын «Егемен Қазақстан» телеграм каналынан оқыңыз