Дипломатиялық корпус өкілдерімен кездесті

Олардың бірі – коронавирус пандемиясымен күрес жұмыстары және індеттің әлеу­меттік-экономикалық салдарын еңсеру болса, екіншісі – Мем­­лекет басшысының бас­та­ма­сымен қолға алынған ке­­шен­ді реформаларды іске асы­руды құқықтық тұрғыдан қам­­­та­масыз ету. Сондай-ақ М.Әшім­­­баев өз сөзінде пан­де­мия ке­зең­ін­де азаматтар мен биз­­нес­­­ті қолдау мақсатымен қа­был­­­дан­­ған маңыз­ды заңдарға тоқталды.
«Қазақстанда азаматтарымызды қор­ғауға және экономикамызды қолдауға арналған дағдарысқа қарсы ауқымды шаралар қабылданды. Былтыр осы мақсатқа 14 млрд доллардан астам қаражат немесе жалпы ішкі өнімнің 9 пайызы бөлінді. Дағдарысқа қарсы заңдар жедел қабылданып отырды. Олардың қатарында бюджетке, Салық кодексіне түзетулер енгізу, биз­нес пен инвесторларды қол­дау мәселелері, медицина қыз­мет­керлеріне көмек көрсету туралы және басқа заңдар бар», деді Сенат Спикері.
Сонымен қатар ол ел Пре­зи­ден­тінің бастамасымен қол­ға алынған жүйелі ре­фор­­ма­лардың іске асырылуын заңна­ма­лық тұрғыдан қамтамасыз ету жолындағы Пар­­­­ламенттің қызметі туралы сөз қозға­ды.
«Мемлекет басшысы елі­мізді жаң­ғыр­ту бағытында алда­ғы мақсат-міндеттерді нақ­­ты­­­­лаған. Олар – ең алдымен, саяси жүйе­­ні демо­кратия­­­лан­дыру, оның тең­герім­­­­­ділігін қамтамасыз ету, сая­си бәсе­келес­тікті арттыру, аза­­мат­­тар­­дың құқық­тар­ын іске асы­ру үшін лайықты жағдай жасау және тағы басқалары», деді М.Әшім­­баев.
Сенат Төрағасы ел Прези­ден­тінің жаң­­ғырту бағытындағы басымдықтар – мем­лекеттік басқарудың тиімділігін арт­ты­ру, мемлекеттік органдардың халыққа ашық болуын қамт­а­масыз ету және жұ­мыс барысында азаматтардың пікірлерін ескеру екенін айтты. Мұндай тәсілдер­дің негізі «Халық үніне құлақ асатын мем­лекет» тұжы­рым­дамасында айқын көр­сетілген.
«Қазақстан Президентінің әлеуметтік саладағы реформалары әділ, инклюзивті әлеу­меттік саясатты іске асыруға, білім беру және денсаулық сақтау салаларын жаң­­ғыр­туға бағытталған. Біз әр азамат өз мүм­кін­дігін іске асыруына және кө­мекке мұқ­таж жандардың назардан тыс қалма­уы­на баса мән береміз», деді М.Әшім­баев.
Одан бөлек, Сенат Спикері эконо­ми­кадағы басты міндеттер – әртараптандыру, өңдеу өнер­кәсібін дамыту, шикізатқа тәуелділікті еңсеру, шағын жә­не орта бизнесті жүйелі түрде қол­дау екенін тілге тиек етті. Бұл міндеттердің бәрі пандемиядан кейінгі кезеңдегі басымдықтармен үндеседі.
«Жалпы, 2020 жыл бастал­ғалы бері Қа­зақ­стан Парламенті 175 заң қабыл­дады. Оның жар­тысы, нақты айтқанда, 91 заң Мемлекет басшысының елі­мізді жаң­ғырту бағдарын іске асыруды заңнамалық тұр­­ғыдан қамтамасыз ету үшін қабыл­данды. Барлық заң­ның төрттен бірі депу­тат­тар­дың бастамашылдығымен әзір­ленді», деді Сенат Төрағасы.
Ол сөз барысында Прези­дент рефор­малары аясында қабылданған негізгі заңдарға тоқталып өтті. Мәулен Әшім­баев Мемлекет басшысы «Қазақ­стан Рес­пуб­ли­касының адам құқықтары саласын­дағы одан әрі шаралары туралы» Жар­­лық­қа қол қойғанына да назар аударды.
«Осы Жарлыққа сәйкес біз алдағы уақытта аса маңызды заңдарды қабылдаймыз. Атап айт­қанда, мүгедек адамдардың құқықтарын қорғауға, әйелдерге қатысты кемсітушіліктің кез келген нысанын болдырмауға, қылмыстық сот төрелігі, азап­тау­лар мен зомбылықтың алдын алу бойынша азаматтардың құқықтарын қорғауға басымдық беріледі. Сондай-ақ сот-құқық қорғау жүйесін жаңғырту және сыбайлас жемқорлықты жою мәселелері де назардан тыс қалмайды», деді Сенат Төрағасы. Оның айтуынша, Мемлекет басшысының бастамасымен іске асырылып жатқан реформалар саяси жүйенің сапалы өзгеруіне септігін тигізеді және олар ұзақ мерзімді сипатқа ие.
Сөз соңында Мәулен Әшім­баев Сенат халықаралық ынты­мақ­тастықты дамытуға және жаңғырту реформаларын іске асыруда тәжірибе алмасуға мүд­делі екенін атап өтті.
«Біз елімізде жүргізіліп жат­қан өзге­рістерге қатысты халық­аралық ұйым­дар­­дың, шетел­дік саясаткерлер мен сарап­­­­шы­­лардың ұсыныстарын үнемі на­зарда ұстаймыз. Заң қабыл­­даған кезде оның бәрін еске­ре­міз. Алдағы уақытта да ын­ты­­ма­қ­тастыққа, өзге елдер­дің Пар­ла­мент­терімен өзара бай­ланыс орнатуға әрдайым ашық­пыз», деді М.Әшімбаев.
Кездесуді Сенат Төраға­сының орынбасары Нұрлан Әбді­ров жүргізіп отырды. Іс-шара барысында сенатор­лар Вла­димир Волков, Дәурен Әділ­беков және Динар Нөке­таева сөз сөйледі.
В.Волков өз сөзінде биылғы 5 айда жалпы қылмыстық істердің 68 пайызы соттарда электронды форматта қарал­ғанын атап өтті. «Соңғы жылдары қыл­мыстық сот төрелігін ырықтандыру және құқық қорғау қызметін цифрландыру бойынша айтарлықтай жұмыс жүргізілді. Айталық, осы жылдың 5 айында жалпы қылмыстық істердің 68 пайы­зы соттарда электронды фор­матта қаралды. Әкімшілік құ­қық бұзушылық бойынша 90 пайыз электронды хаттама рәсімделді. Қызметтің мұн­дай форматы қылмыстық про­цесс кезеңдерінің ашықтығын және тергеудің шынайылығын қамтамасыз етуге, қағаз­бас­тылықты, бұрмалаушылық фак­тілері мен қателіктерді тө­мен­детуге септігін тигізеді. Ең ма­ңыздысы – жем­қор­лық­тың қысқаруы», деді сенатор.
Д.Нүкетаева адам құқық­тарын қам­та­масыз ету, әйелдер­дің, мүмкіндіктері шектеулі адам­дардың, балалардың мүд­де­лерін қорғау жөнінде баян­дады.
«Біз көптеген елдердің Конс­ти­ту­цияларында ерлер мен әйелдердің тең құқық­тары бекітілген прогресс дәуірінде өмір сүріп жатырмыз. Бұл елдерде әйел­дер қоғамның экономикалық өміріне арала­сады, олардың дауыс беруге, білімге қол жеткізуге құқықтары бар. Біздің мем­ле­кетіміз де әлемдік өркениеттің ажыра­мас бөлігі бола отырып, жоғарыда атал­ған құндылықтарды ұстанады», деді де­путат.