Абай атындағы Қазақ ұлттық академиялық опера және балет театры 87-ші театр маусымының аяқталуына орай, көрермен назарына «Спартак» балеттің жаңартылған нұсқасын ұсынды. Қойылымды балетмейстер Гүлжан Тұтқыбаева, Ресейдің халық суретшісі Вячеслав Окунев қойды. Қоюшы дирижері - Қазақстанның еңбек сіңірген қоғам қайраткері Ерболат Ахмедияров.
Премьераға балет труппасының барлық құрамы қатысты Басты партияларды Жанель Түкеева, Азамат Асқаров, Архат Әшірбек, Айман Егісбаева, Малика Елшібаева, Нельсон Пенья, Гүлвира Құрбанова, Рахым Дайыров сынды жетекші солистер орындады.
Елу жыл бұрынғы премьерада Красс рөлін сомдаған ҚазКСР еңбек сіңірген әртісі Эдуард Мальбеков те әртістерге кеңес беріп, бағыт-бағдар көрсеткен. Ол өз кезегінде қойылымның туған сахнасына қайта оралғанына қуанышты екенін айтты.
«Әрине, Гүлжан Тұтқыбаева мен суретші Вячеслав Окуневтің өзгертулері енгізілді. Алайда ол Зәуірбек Райбаев қойған спектакль күйінде қалып отыр. Барлық балет труппасы жоғары нәтиже көрсетті. Осы қойылым аясында еңбек еткен барлық маман өз міндетін мінсіз атқарып шықты», деді Эдуард Мальбеков.
Айта кетейік, қойылым үшін арнайы 300-ден астам костюм тігілген.
