Театрлық көпшілік сахна көріністерінің ерекшелігі – сахна кеңістігіндегі әр бұрыштың өзіндік өмірі, тыныс-тіршілігі болды. Ал осынау тіршілікке ресейлік опера режиссері Михаил Панджавидзе жан бітіріп, мизансценаларды айрықша талғаммен орналастырды.
Бұл кеште симфониялық оркестр әрбір нөмірде түрлі дыбысталды. Оған кәсіби дирижерлер – Қазақстанның еңбек сіңірген қайраткері Абзал Мұхитдин, Джузеппе Акуавива (Италия), Руслан Баймурзин жетекшілік етті. Ал бас хормейстер – Қазақстанның еңбек сіңірген қайраткері Ержан Дәуітов.
Айгүл Ниязова мен Саян Исиннің орындауындағы М.Төлебаевтың «Біржан – Сара» операсынан Айтыс пен Мереке би кештің шымылдығын ашты, ұлттық нөмірлер батыс еуропалық классикамен алмасты – С.Мұхамеджановтың «Айсұлу» операсынан Серкенің каватинасы, Дж.Пуччинидің «Тоска» операсынан көрініс, «Турандот» операсынан Калафтың ариясы және тағы басқа көптеген композициялар орындалды. Сондай-ақ Марианджела Сицилия, Риккардо делла Шукка, Маттиа Росси (Италия), Бадрал Чулуунбаатар (Моңғолия), Бауыржан Әндержанов, Медет Чотабаев, Жұпар Ғабдуллина, Талғат Мұсабаев, Салтанат Ахметова, Азамат Жылтыркөзов, Альфия Каримова, Болат Есімханов, Шыңғыс Расылхан, Расул Жармағамбетов және т.б. опера сахнасының танымал есімдері өнер көрсетті.
«Мұндай маңызды концерттің қатысушысы болғаныма қуаныштымын. Нұр-Сұлтанда алғаш рет өнер көрсету мүмкіндігі туды, осы шаһардың, осындай керемет театрдың тамаша энергетикасын сезіндім. Бүгін өзім үшін қашан да маңызды болған әрі маңызды болып қала беретін екі арияны – Ш.Гуноның «Ромео мен Джульетта» операсынан Джульеттаның ариясын және Дж.Вердидің «Травиата» операсынан Виолеттаның ариясын орындадым. Менімен бірге сахна төрінде «Астана Опера» Халықаралық опера академиясының бір бөлігі саналатын әншілер, оқытушылар өнер көрсетті, олардың орындаушылығына, дыбысталуына тәнті болдым. Жас дарындарды осындай жоғары деңгейде үйлестірілген академияда оқуға тарту өте маңызды деп есептеймін», деп атап өтті Марианджела Сицилия.
Ал Риккардо делла Шукка: «Жас әншілердің дамуы мен өз тәжірибесінің ауқымын кеңейтуге мүмкіндік берудің пайдасы зор деп білемін. Ла Скала театрының Академиясы маған осы мүмкіндікті берді, әлемдегі барлық жас әншілерге, оның ішінде жаңа Astana Opera Халықаралық академиясының вокалистеріне осындай тәжірибеден өтуге кеңес беремін», деді.
Салтанатты кешке Мәдениет және спорт министрі Ақтоты Райымқұлова, театр қайраткерлері, музыкалық сыншылар мен басқа да мәдениет, қоғам қайраткерлері қатысты.
Еске сала кетейік, Astana Opera Халықаралық опера академиясы вокалистермен өз жұмысын күзде бастайды.
