Жақында Шығыс Қазақстан облыстық экономика және бюджеттік жоспарлау басқармасы бастығының орынбасары Сәуле Ұлақова ақпарат құралдары өкілдерімен кездесіп, мемлекет-жеке меншік әріптестігі арқылы Өскеменде – 6, ал Семейде 5 балабақша құрылысы басталатынын айтты.
Жақында Шығыс Қазақстан облыстық экономика және бюджеттік жоспарлау басқармасы бастығының орынбасары Сәуле Ұлақова ақпарат құралдары өкілдерімен кездесіп, мемлекет-жеке меншік әріптестігі арқылы Өскеменде – 6, ал Семейде 5 балабақша құрылысы басталатынын айтты.
– Балабақшалар кешенінің құрылысына қатысты жобалар алдымен Астана қаласына сараптамаға жіберілді. Біз қаншама асыққанымызбен министрлікте құжаттар рәсімдеуден ұзақ уақыт өтеді. Әр жоба салалық, экономикалық сараптамадан кем дегенде үш рет өтеді, – деді өз сөзінде С.Ұлақова.
Бұған қоса, денсаулық сақтау саласындағы жобалар да бар. Өскемен қаласындағы 300 орынға шақталған көпсалалы аурухананың құрылысы және Семейдегі 200 орынға шақталған балалар ауруханасының жобалары да Астана қаласына мемлекеттік сараптамаға жіберілді. Әзірге анықталған кемшіліктерді жою шаралары қолға алынды. Мемлекет-жеке меншік әріптестігі орталығының басшысы Әлия Масағанованың айтуына сүйенсек, қазіргі таңда барлық жобалар инвесторлардың қолдауын тапты. Сонымен қатар, орталық «Даму» қорымен, екінші дәрежелі банктермен тығыз байланыс орнатты.
Өңір басшысы Б.Сапарбаев мұның алдындағы алқалы жиында Шығыс өңірінде әлеуметтік жобаларды жүзеге асырып қана қоймай, инвесторларды қызықтыратындай өзге де жобаларды қарастыру қажет екендігін атап көрсеткен.
– Ақтау мен Атырау қалаларында әуежай құрылысына қатысты тиімді жобалар бар. Бізге де осы сынды бағдарламаларды қарастыру қажет. Семей қаласында көлік-логистикалық кешеннің барын ескерсек, осындай жобалар біз үшін де, инвесторлар үшін де тиімді, – дейді облыс әкімі бұл жобаларға оң көзқарасын білдіріп.
Оңдасын ЕЛУБАЙ,
«Егемен Қазақстан».
ӨСКЕМЕН.
