Жиі кездесетін жол-көлік оқиғаларының салдарынан 400-ден астам жолаушы әрқилы дене жарақатын алды. Мүгедек болып қалғандары қаншама. Жол полициясы қызметкерлері ел ішінде апаттың алдын алу бағытында жұмыс жүргізіп жатыр. Алайда қаншама ескертіп, алдын алу шаралары жүргізілгенімен, қасіретті көрсеткіш өткен жылдың сәйкес мерзімімен салыстырғанда 15,4 пайызға өскен. Былтыр орын алған 221 жол апатының салдарынан 30 адам мерт болып, 363 адам жарақат алса, биылғы алғашқы жарты жылдықтың өзіндегі көрсеткіш былтырдан көп.
– Жылдамдықты шамадан тыс арттыру оқиғалары жиі орын алады. Байқаусызда қарсы бағытқа шығып кету, темір тұлпарды мас күйінде жүргізу де жиі кездеседі, – дейді облыстық көлік бақылау инспекциясының аға инспекторы Әділбек Сұрағанов.
Өткен жылы жол-көлік апатының алдын алуға бағытталған ондаған рейд ұйымдастырылған екен. Іс-шара барысында 78 мыңнан астам жол ережесін бұзу фактілері тіркеліпті. Бұрнағы жылмен салыстырғанда, бұл көрсеткіш 219 пайызға көбейген. Оның ішінде 58 548-і жол-көлік ережесін өрескел бұзу санатына жатады.
Мамандар жол-көлік оқиғасының жиі кездесуі курортты аймақтың үлесінде дейді. Екінші себебі, айтып келмес апатқа душар болу адамдардың өздерінен. Мәселен, жыл басынан бері мас күйінде көлік тізгіндеген 469 көлік жүргізушісі ұсталған. Бейбіт күнде мас күйінде көлік жүргізіп, апатқа ұшырап жатқандар туралы ақпаратты күнде оқып, көріп жүрсе де, саналарына тоқып, сабақ алмайтындары несі екен?!
Ақмола облысы
