Қоғам • 13 Шілде, 2021

Электронды еңбек биржасында бос жұмыс орындары көп

39 рет көрсетілді

«Еңбек ресурстарын дамыту орталығы» АҚ деректері бойын­ша биыл маусым айында Электронды еңбек биржасында 96,4 мың бос жұмыс орны және 49,2 мың түйіндеме орналастырылған. Яғни өткен аймен салыстырғанда ЭЕБ-дағы бос жұмыс орындарының саны 28%-ға, ал түйіндемелер саны 6%-ға өсті. Бос жұмыс орындарының саны әсіресе елдің оңтүстік облыстарында көбірек өскенін айта кеткен ләзім.

Еңбек және халықты әлеу­меттік қорғау министрлігі бас­пасөз қызметінің хабарлауынша, ЭЕБ-да орналастырылған бос орындардың үштен бір бө­­лігі (29,9 мың жұмыс орны) тө­­мен біліктілікті талап ететін кә­­сіптерге жатады. Сұраныс бо­­йын­ша екінші орында өнер­кә­сіп жұмысшылары – 16% немесе 15,8 мың жұмыс орны, үшінші орында кәсіби маман­дар – 15% немесе 14,6 мың жұмыс орны. Салаларға ке­ле­тін болсақ, маусым айында орналастырылған бос орындардың жалпы көлеміне өзге де қызметтер, ауыл шаруа­шылығы және құрылыс салалары негізгі үлес қосты. Осы­лайша, осы үш саланың кәсіп­орындары бір ай ішінде 20 мың­нан астам бос жұмыс орнын жариялады.

Егер бос орындардың айлық серпінін қарастыратын болсақ, өткен аймен салыстырғанда бос орындар санының макси­малды өсімі білікті емес жұ­мыс­шыларға (+7,9 мың), өнер­­кәсіп жұмысшыларына (+3,9 мың), сондай-ақ қыз­мет көрсету және сату сала­сын­­дағы қызметкерлерге (+2,9 мың) келеді. Атап айт­қан­­да, біліктіліктің болуын талап етпейтін кәсіптер ара­­сында бір ай ішінде қо­сал­қы жұмысшыларға, кө­гал­дандыру жөніндегі жұ­мыс­шыларға, әртүрлі жұмыстарды орындаумен айналысатын жұ­мысшыларға сұ­ра­ныс артты. Өйткені ауыл шаруа­шы­лығы мен құрылыста мау­сым­дық жұмыстар жанданды. Өнеркәсіп жұмысшылары ара­сында тігіншілер, слесарь-жөндеушілер, автослесарьлар және электромонтерларға сұраныс көбірек өсті. Ал қызмет көрсету және сату саласындағы қызметкерлер арасында күзет­шілерге, аспаздарға және тәр­биешілердің көмекшілеріне сұраныс артты.

Жекелеген білікті маман­дықтарды қарастыра отырып, маусым айында білікті кәсіптер арасында консультант-сатушылар (323 түйіндеме және 1 581 бос жұмыс орны), автомобиль жүргізушілері (872 түйіндеме және 1 854 бос жұмыс орны) жетіспейтінін атап өткен жөн. Мейірбикелерге/мейіргерлерге деген сұраныс еңбек нары­ғындағы ұсыныстан әлі де бұрынғысындай асып түседі (628 түйіндеме және 1 249 бос жұмыс орны). Біліктілігі жоқ қызметкерлердің арасын­да жүк тиеушілер, қо­салқы жұ­мысшылар, түрлі жұ­мыстарды орындаумен ай­налысатын адамдар, ас үй жұ­мысшылары жетіспейді. Маусым айында ең тапшы мамандықтар қатарына біліктілігі жоқ құ­рылыс жұмысшылары мен ферма шаруашылығындағы түрлі жұмыстарды орындаумен айналысатын жұмысшылар қосылды.

Маусым айында білікті кә­сіптер арасында мал өсіру­шілер (1 204 түйіндеме және 320 бос жұмыс орны), заңгерлер (539 түйіндеме және 254 бос жұмыс орны) артық болды. Ағымдағы жылдың алдыңғы айларынан айырмашылығы, маусым айында артық мамандықтар тізіміне фирма директорлары (236 түйін­деме және 9 бос жұмыс орны) және техник-бағдар­ламашылар (210 түйіндеме және 53 бос жұмыс орны) кірді. Бі­ліктіліктің болуын талап етпейтін кәсіптер арасында елді мекендерді абаттандыру бо­йын­ша жұмысшылар, вах­терлер мен консьерждер, курьер­­лер, сондай-ақ аумақтар­ды абат­тандыру бойынша жұ­мысшылар сұранысқа ие емес.

Өңірлік бөліністе өткен ай­­лардағыдай бос жұмыс орын­­дарының ең көп саны Қос­­танай, Қарағанды облыс­та­­рында, Нұр-Сұлтан және Алма­ты қалаларында жарияланды. Жоғарыда аталған екі мегаполиске қарағанда, Шым­кент қаласында маусым айында елдегі бос орындардың ең аз саны – барлығы 2 410 бір­лік немесе бос орындардың жал­пы санының 2%-ы ғана ор­наластырылған.

Өңірлер бойынша бос орындар серпіні көрсетіп отыр­ған­дай, бір ай ішінде бос орындар санының ең көп өсуі оңтүстік облыстарда – Жамбыл (+84%), Қызылорда (+70%) және Түр­кістан (+62%) облыстарын­да байқалды. Барлық үш өңір­де қосалқы жұмысшылар аса тапшы болды. Бұл ретте Жам­был облысында бос жұ­­мыс орындарының саны түйін­­демеге қарағанда екі есе көп болды. Жамбыл облысында қосалқы жұмысшылармен қатар консультант-сатушы­лар мен күзетшілер, Қызылорда облысында түрлі жұмыстарды орын­даумен айналысатын адамдар, электр және бас­қа да қондырғыларды бақы­лаушылар, Түркістан облысында түрлі жұмыстарды орын­даумен айналысатын адам­дар, соның ішінде фер­мер­лік шаруашылықтағы жұ­­мысшылар сұранысқа ие болды. Оңтүстік аймақтарда жұмыс күшінің жетіспеушілігі факторларының бірі коронавирус инфекциясына байланысты көрші елдерден маусымдық мигранттарды тартудағы қиын­дықтар болуы мүмкін.

Орналастырылған түйін­демелерге қатысты ЕРДО талдаушылары елдің 8 өңірінде түйіндемелер санының арт­қанын атап өтті. Ең үлкен өсім (+63%) Ақтөбе облысында байқалды. Сонымен қатар ел бойынша түйіндемелердің ең үлкен өсуі қосалқы жұ­мыс­шылар, көгалдандыру бо­йынша жұмысшылар, елді мекендерді абаттандыру бойын­ша жұмыс­шылар және түрлі жұмыстарды орындаумен айналысатын жұ­мысшылар сияқты бі­лік­ті­лікті талап етпейтін кәсіп­тер бо­йынша байқалады. Білік­ті қызметкерлер арасында түйін­деменің ең көп өсуі тәр­бие­шілерде, компания директорларында және консультант-сатушыларда байқалады.

Жалпы алғанда, қажетті біліктілік деңгейі бойынша нарықтағы сұраныс ұсынысты қанағаттандырады және қызмет көрсету, құрылыс және ауыл шаруашылығы салаларындағы экономикалық қызметтің қар­қындылығын көрсетеді.

Соңғы жаңалықтар

Тағы 1650 қазақстандық індет жұқтырды

Коронавирус • Бүгін, 09:00

Софиядан олжалы оралды

Спорт • Бүгін, 08:40

Жас теннисшілер жарады

Теннис • Бүгін, 08:32

Тұтынушы құқығын қорғайды

Қазақстан • Бүгін, 08:27

Ұқсас жаңалықтар