Үкіметтің кеңейтілген отырысында Президент Қасым-Жомарт Тоқаев құрылыс материалдары мен жылжымайтын мүлік нарығы бағасының өсуін тежеу жөніндегі кешенді шаралар легін қабылдауға тапсырма бергені белгілі. Осыған байланысты министрлік бірқатар ауқымды жұмыстарды қолға алыпты. Бірінші вице-министрдің айтуынша, ведомство баспана бағасына үнемі мониторинг жүргізіп отыр. «Биылғы қаңтар айында жылжымайтын мүлік нарығы кенет қымбаттап, жаңа үйлердің бағасы республика бойынша бірден 3,8%-ға көтерілді. Ал нарықтағы баға 7,2%-ға шарықтады. Маусым айындағы мониторинг бойынша ескі үйлердің бағасы 1,2%-ға артса, жаңа пәтерлердің құны 0,9% өсті», деді министр Орталық коммуникациялар қызметі алаңында өткен брифингте.
Еліміз бойынша, әсіресе Петропавл қаласында үй қатты қымбаттаған. Мұнда қаңтар-ақпан айларында үйдің нарықтағы бағасы 5,6%-ға дейін өсіп, сәуір айында 2,4%-ға төмендеген.
Қ.Өскенбаевтың айтуынша, жыл басында тұрғын үй нарығының қымбаттауы зейнетақы қорындағы ақшаны пайдалануға байланысты болды. Қазір баға тұрақталып келеді. «Менің жеке болжамым бойынша күзге қарай тұрғын үй бағасы арзандай бастайды», деді ол.
Мемлекет басшысының тапсырмасынан кейін қазір құрылыс материалдары мен баспана бағасын тежеу бойынша сең қозғалып жатқаны анық. Тіпті өндіруші мен құрылыс салушы арасында тікелей келісім жасау арқылы бағаны арзандату мәселесі «Атамекен» ұлттық кәсіпкерлер палатасына жүктелді.
Негізі бұл шешімдер баспана бағасы қымбаттамай тұрып қабылдануы керек еді. Өкінішке қарай, бізде мәселе әбден ушыққаннан кейін ғана сең қозғалады. Енді бір көтерілген бағаның қайта түсуі екіталай...
