Ел тұрғындары мемлекеттік қызмет саласына жиі шағымданып жатады. Бірақ халықтың бірі өтініші қаралса, екіншісі құзыретті орган назарынан тыс қалатыны бар. Ал азаматтардың мемлекеттік органдарға жолдаған арыз-шағымдары қаншалықты қаралып, орындалғанын бақылайтын бірыңғай жүйе болған емес. Енді жаңадан жұмыс істей бастаған eOtinish электронды қызметі бірде-бір арыз-шағымның жерде қалмауын қамтамасыз етеді, дейді Цифрлық даму, инновациялар және аэроғарыш өнеркәсібі вице-министрі Әсет Тұрысов. «Бұрын бізде азаматтардың өтініштерін қарайтын, орындалуын қадағалап отыратын жүйе болған жоқ, сондықтан біз қандай да бір талдау жүргізіп, өтініштердің қаралу процесін бақылай алмадық. Мұндай дерек қолымызда болмайынша мемлекеттік мекемелердің жұмыс сапасын бағалау және өтініш берушілердің қай салаға көбірек шағымданатынын анықтау да қиын. EOtinish электронды өтініштер жүйесін енгізу – осы мәселелерді шешеді», дейді Ә.Тұрысов.
Министрлік бұл жүйе мемлекеттік органдар жұмысының тиімділігін арттыратынына сеніп отыр. Ал келіп түскен арыз-шағымдар Әкімшілік рәсімдік-процестік кодекс бойынша 15 жұмыс күннің ішінде қаралып, жауап берілуге міндетті.
Вице-министрдің түсіндіруінше, өтініштерді екі жолмен беруге болады. Тұрғындар халыққа қызмет көрсету орталықтарына, әкімдікке немесе мемлекеттік органға келіп, өтінішін қалдырады. Қазір ХҚО-ларда eotinish арқылы өтініштерді қабылдайтын арнайы пункттер ашылған. Олардың саны – 259. ХҚО операторы жеке кабинетте азаматтың өтінішін қабылдап, оны eOtinish жүйесіне тіркейді. Мемлекеттік органдар қызметкерлері қабылдаған өтінішті жүйеге қосады.
«EOtinish жүйесі әрбір ауыл әкімдігінде де орнатылады. Әкімдіктердің қызметкерлері жүйені пайдалану жөнінде арнайы оқудан өтті. Енді олар осы электронды жүйе арқылы жергілікті тұрғындардың арыз-шағымын қабылдамақ. Ауыл тұрғындары мемлекеттік мекемелерге деген қандай да бір өтініш-ұсынысы болса, әкімдіктерге барып, арызын жүйеге тіркете алады. Ал егер ХҚО немесе мемлекеттік органға баратын уақыты болмаса, онда өтінішті eGov порталы, eOtinish, eGov mobile, aitu мобильдік қосымшалары арқылы беруге болады», дейді Ә.Тұрысов.
ЕOtinish электрондық жүйесінің ерекшелігі сол, әрбір азамат өзінің өтініші қайда, қандай мекемеге жолданғанын, қай кезде қаралғанын жүйе арқылы қарап, бақылай алады. Сонымен қатар арыз-шағымына деген мемлекеттік мекеменің жауабын бағалауға да мүмкіндігі бар. Осы арқылы тиісті органдардың халыққа қызмет көрсету сапасын саралауға болады.
Жүйеде өтініші тіркелген азаматтарға SMS-хабарлама арқылы арыз-шағымының қаралу кезеңдері туралы хабарламалар жіберіледі. Оның қаралу тарихы жүйеде сақталады және мемлекеттік орган бұрын қандай шешім қабылданғанын саралай отырып, әкімшілік іс қалыптастыра алады.
Eotinish электронды өтініштер жүйесінің бас операторы – «Азаматтарға арналған үкімет» мемлекеттік корпорациясы. Корпорацияның міндеті – eOtinish арқылы алынған деректерге талдау жүргізеді. Мұндай талдау жұмыстары еліміздің әр өңіріндегі тұрғындарды қандай мәселе көбірек толғандыратынын, мемлекеттік органдар қаншалықты тиімді жұмыс істейтінін анықтауға мүмкіндік береді екен.
