Бүгінгі таңда елімізде коронавирус инфекциясына қарсы вакцинаны 7,6 млн адам алды. Оның ішінде бірінші компонентпен 4 872 183 адам вакцина салдырды, бұл тиісті халықтың 46%-дан астамын құрайды. Екінші компонентпен 2 772 914 адам қамтылған. Егу пункттерінде вакцина көлемі жеткілікті: бірінші компоненттің шамамен 753 мыңы және екінші компоненттің 1 млн 280 мыңы бар. Тәулік сайын республика бойынша орта есеппен 80-100 мың адам вакцина салдырады.
Инфекциялық ауруларды эпидемиялық қадағалау бөлімінің басшысы Роза Қожапова вакциналау – вирустың таралуын азайтудың және бұрынғы өмір салтына, жұмысқа, қарым-қатынасқа, отбасылық дәстүрге және саяхатқа оралудың жалғыз тәсілі екенін айтты. Қазір алаңдаушылық тудыруы мүмкін жаңа штамдардың пайда болуын тоқтатудың ең тиімді шарасы да – вакциналау. Мақұлданған COVID-19-ға қарсы вакциналар вирустың жаңа нұсқаларынан біршама қорғауды қамтамасыз етеді, өйткені бұл вакциналар бірқатар антиденелер мен жасушалардың қатысуымен кең иммундық реакцияны тудырады. Сондықтан вирустың өзгеруі немесе мутациясы вакциналарды толығымен тиімсіз етпеуі керек.
Денсаулық сақтау магистрі, Санитариялық-эпидемиологиялық сараптама және мониторинг ғылыми-практикалық орталығының өкілі Манар Смағұл вирус мутациясының себептерін және одан міндетті түрде қорғауды түсіндірді.
«Вирустар барлық тіршілік иелері сияқты өмір бойы мутацияға ұшырайды. Вирустың мутациясы бірнеше апта немесе айлар ішінде сезімтал адамдарға байланысты тез жүреді. Кейбір мутациялар вирусты тұрақсыз және осал етеді, ал кейбір мутациялар вирустың жұқпалы болуын, өлімді арттырады, аурудың ауыр ағымын тудырады. Қолданыстағы вакциналардың, емдеудің және басқа да алдын алу шараларының тиімділігін төмендететін мутацияның алдын алу үшін қолдан келгеннің бәрін жасауымыз керек», деді сарапшы.
Қазақстанда бүгінгі таңда негізінен COVID-19-ға қарсы екі вакцина – Спутник V мен QazVac пайдаланылады, бірқатар өңірде аз мөлшерде Hayat Vax және CoronaVac бар.
